За пяць дзён сімфанічны аркестр ВНУ разам з салістамі праедзе па ўсіх абласных цэнтрах. На афішах тура сусветная і руская класіка, аўтарскія творы сучасных беларускіх кампазітараў і падборка песень вайны. Наталля Бардзілоўская - падрабязней.
Больш як сто юных музыкантаў - студэнтаў Беларускай акадэміі музыкі, палова якіх лаўрэаты міжнародных конкурсаў і стыпендыяты спецыяльнага фонду па падтрымцы таленавітай моладзі, праедуць па ўніверсітэцкіх цэнтрах Беларусі для таго, каб сустрэцца з аднагодкамі і паказаць сваё мастацтва. Дарэчы, тур стаў магчымым дзякуючы не толькі творчай энергіі маладых, але і гранту спецфонду Прэзідэнта.
Грант кансерваторыі - адзін з чатырохсот, якімі спецфонд падтрымаў творчыя праекты за 20 гадоў свайго існавання. За мінулыя дзесяцігоддзі незалежнай Беларусі падтрымку дзяржавы атрымалі каля трох тысяч маладых людзей. Агульная сума, якой заахвоцілі і ўзнагародзілі таленавітую моладзь, - звыш 14 мільярдаў рублёў. Але стыпендыі, прэміі і грашовыя гранты на ажыццяўленне праектаў - не адзінае, чым фонд заахвочвае творчасць. Таленавітыя маладыя людзі атрымліваюць неабходны інструментарый і касцюмы, месца ў тэле-, радыёэфіры і на прафесійных пляцоўках краіны.
Тур пад назвай "Студэнты Акадэміі музыкі - моладзі Беларусі" для многіх дэбют вялікіх гастроляў. Прэстыжнае тыднёвае канцэртаванне на лепшых пляцоўках абласных цэнтраў.
У юбілейных канцэртах прагучаць ваенныя песні, шэдэўры сусветнай класікі і сучасная аўтарская музыка.
Для меламанаў будзе іграць сімфанічны аркестр кансерваторыі і салісты, адзін з якіх - самы першы стыпендыят спецфонду Алег Яцына - сыграе на знакамітай скрыпцы Гварнеры (яна таксама адправілася ў тур).
Спецыяльны тур Акадэміі музыкі завершыцца 29 верасня гала-канцэртам на сцэне Белдзяржфілармоніі. Ён будзе ўключаны ў юбілейны Дзясяты міжнародны фестываль Юрыя Башмета.
