З раніцы ў горадзе адкрылі памятны знак "Янава слова" і заклалі сад малітваў. І на сувязь са студыяй ізноў выходзіць Вольга Мядзведзь.
У гэтым годзе на разгляд экспертнай камісіі было пададзена 59 кніг. Нацыянальная літаратурная прэмія праводзілася толькі сярод выданняў, якія ўбачылі свет з 1 студзеня па 31 снежня 2017 года.
Дыпломы, прызы - сімвалы конкурсу - і грашовыя прэміі ўручылі па 7 намінацыях. Казімір Камейша стаў аўтарам лепшага паэтычнага зборніка, за выдатны празаічны твор узнагароджаны Васіль Шарко, прэмію за публіцыстычны зборнік атрымала Зінаіда Дудзюк, лепшы твор для дзяцей напісала Вольга Нікольская. Дэбютам года прызнаная Юлія Алейчанка, Георгій Марчук перамог у намінацыі драматургіі, а лепшы твор літаратурнай крытыкі і літаратуразнаўства ў Івана Штэйнера. З творамі пераможцаў можна азнаёміцца на сайце Нацыянальнай літаратурнай прэміі і Міністэрства інфармацыі.
Да юбілейнага свята роднага слова і Дня горада Іванава беларускія паштавікі выпусцілі тэматычныя марку і канверт. Памятнае гашэнне адбылося некалькі хвілін таму каля мясцовага аддзялення пошты.
Нягледзячы на тое, што свята толькі распачалося, праз паўгадзіны Іванава перадае эстафету наступнаму гораду. У 2019 годзе Дзень беларускага пісьменства адправіцца на Гродзеншчыну ў Слонім. Сёння ж свята будзе да вечара і завершыцца гала-канцэртам зорак эстрады.
