З’явіцца ён на сваім гістарычным месцы, дзе калісьці і ўзвышаўся - на беразе Дняпра. Амаль тры стагодззі - з 17-га па сярэдзіну 20-га - ён заставаўся адным з самых папулярных сярод праваслаўных прыходаў. Урачыстае асвячэнне месца пад будучы храм сабрала нямала вернікаў, гісторыкаў і звычайных гараджан. І невыпадкова, бо папярэднічаў гэтай падзеі сапраўдны цуд.
Андрэй Ястрабаў гатовы апісаць яго. Не інакш, як цудам, называюць знаходжанне самога месца, дзе калісьці і ўзвышаўся храм. Ад мінулага стагоддзя засталіся рэдкія яго фотаздымкі. А ў 50-ыя ўзбярэжжа Дняпра ператварылася ў вялікую будаўнічую пляцоўку - узводзілі самы галоўны мост абласнога цэнтра. Культавае збудаванне зруйнавалі.
Амаль праз 60 гадоў падчас капітальнага рамонту моста і добраўпарадкавання Падніколля, дзе зараз знаходзіцца жаночы манастыр, і былі знойдзены падмуркі храма. Археолагі і гісторыкі пацвердзілі - яны належаць былой Спаса-Пакроўскай царкве. Месца захавалі. І вось ён - доўгачаканы момант асвячэння.
Вернікі прайшлі хрэсным ходам, а на месцы будучай царквы ўстанавілі драўляны паклонны крыж.
Сам падмурак захаваны ад капрызаў надвор’я дахам. Але нават у такім выглядзе - нібыта ў ангары - ён усё роўна прываблівае турыстаў. Старажытная кладка - цагляная, мураваная. Падчас працы археолагаў нават зрабілі некалькі цікавых знаходак. Напрыклад, глыбокія падвалы, керамічны посуд.
Руіны так і застануцца закансерваванымі. Новы храм, паводле архітэктурных планаў, пабудуюць побач. Зразумела, з дапамогай вернікаў.
Аднак Свята-Пакроўскі храм стане не адзіным, адноўленым на сваім месцы. Падчас рэканструкцыі ў Магілёве Пушкінскага моста праз Днепр знайшлі і падмуркі Траецкай царквы. Лічыцца, што ў закладанні першага яго каменя прымалі ўдзел аўстрыйскі імператар Іосіф і расійская імператрыца Кацярына Другая. Падмуркі гэтага храма пакуль захаваныя ў выглядзе музея пад адкрытым небам.
