Самая маштабная мадэрнізацыя года ў нафтахімічнай галіне

19 Снежня 2015

У Гомельскай вобласці на Беларускім газаперапрацоўчым заводзе рэалізавалі інвестпраект агульным коштам больш за трыльён рублёў. Працэс перапрацоўкі газу аўтаматызавалі, гэта дазволіла выпускаць новыя віды прадукцыі, запатрабаваныя ў сусветных вытворцаў.

Пра адзін з самых значных інвестпраектаў у нафтахіміі - рэпартаж Марыны Севяр'янавай. Каб цалкам аўтаматызаваць перапрацоўку газу, Беларускаму газаперапрацоўчаму заводу спатрэбіліся тры гады і больш за трыльён рублёў. Новая прадукцыя з высокім дабаўленай вартасцю адкрыла прадпрыемству і новыя рынкі збыту.

Раней завод выпускаў толькі аўтамабільнае паліва на аснове газу. Зараз акрамя яго яшчэ і сыравіну, якая запатрабавана на сусветным рынку.

Па гэтых трубах якраз і цякуць індывідуальныя фракцыі вуглевадародаў. Напрыклад, бутан будуць выкарыстоўваць для вытворчасці сінтэтычных каўчукоў і пластмас. Ізапентан – каб атрымаць кампаненты для аўтамабільных бензінаў. А пры змешванні розных фракцый будуць вырабляць сумесі звадкаваных газаў.

Гэта самы маштабны праект нафтахімічнай галінЫ краіны, які рэалізавалі ў 2015 годзе. Дзякуючы яму на заводзе зараз утылізуюць практычна ўвесь газ, які атрымліваюць у працэсе здабычы нафты. Акрамя таго, дзякуючы выпуску новых відаў прадукцыі завод цалкам закрые і патрэбнасці ўнутранага рынку. За год тут будуць перапрацоўваць 550 тысяч тон сыравіны.

У 2016 Беларускі газаперапрацоўчы адзначыць 40 гадоў. Увесь час сюды на перапрацоўку адпраўляюць газ, здабыты на радовішчах нашай краіны, а таксама сыравіну, прывезеную з Расіі. Пастаўшчыкоў, паводле слоў спецыялістаў, прываблівае якасць атрыманай прадукцыі і выгадная цана. А для беларускіх газаперапрацоўшчыкаў такое супрацоўніцтва забяспечвае рытмічныя пастаўкі сыравіны і магчымасць распрацоўваць доўгатэрміновыя праекты.