Гэты рэгіён на поўначы Беларусі называюць краем партызанскай славы. З першых дзён Вялікай Айчыннай тут была жорсткая барацьба супраць акупантаў. І менавіта дзякуючы моцнаму руху народных мсціўцаў у верасні 42 года Расонскі раён быў вызвалены. Хроніка ваенных падзей у рэпартажы Марыны Раманоўскай.
Анастасія Саўчыц падрабязна расказвае пра свой вобраз. Гістарычнай рэканструкцыяй дзяўчына захапляецца шмат гадоў. Каб стаць удзельніцай тэатралізаванага дзеяння, спецыяльна прыехала з Мінска. Гэтым разам выконвала ролю партызанкі.
Старажытная сядзіба на маляўнічым беразе возера. Менавіта тут ажываюць падзеі верасня 42. Рэканструктары дэманструюць фрагмент бою за вызваленне гарадскога пасёлка.
Дэкарацыя і спецэфекты амаль як на тэлеэкране. У масоўцы задзейнічаны мясцовыя жыхары. Сцэнарый заснаваны на рэальных падзеях Вялікай Айчыннай вайны.
Расонскі раён называюць краем партызанскай славы. З першых дзён Вялікай Айчыннай вайны тут была разгорнута шырокая падпольная, а крыху пазней і партызанская барацьба супраць нямецка-фашысцкіх захопнікаў. Дзякуючы значнаму партызанскаму руху ўжо ў 1942 годзе Расонскі раён быў вызвалены ад акупантаў.
У цэнтры Расонаў узведзены мемарыяльны комплекс. На плітах - імёны партызан, савецкіх воінаў, мірных жыхароў. Яны сталі ахвярамі фашысцкай агрэсіі. Побач помнік спаленым вёскам. Зараз у мемарыяльным парку ідзе рэканструкцыя.
