Яе імя стала брэндам Полацка. Арганістка Сафійскага сабора Ксенія Пагарэлая ўдастоена звання заслужанай артысткі Беларусі. Больш за трыццаць гадоў таму выпускніца Маскоўскай кансерваторыі прыехала ў старажытны горад і стала часткай яго культурнага жыцця. Менавіта ёй належыць ідэя правядзення ў Полацку фестывалю арганнай музыкі - летась адбыўся 23-ці, а на нядзельныя канцэрты арганісткі Сафійскага сабора прыязджаюць з розных куткоў Беларусі.
Вольга Маслоўская сустрэлася з заслужанай артысткай Беларусі Ксеніяй Пагарэлай. Велічны гук полацкага аргана. Цяжка ўявіць, што за мануалам - менавіта так называюць клавіятуру гэтага музычнага інструмента - жанчына. Яшчэ ў студэнцтве Ксенія Пагарэлая захапілася арганнай музыкай - творы Баха, запісаныя на грампласцінках, гучалі для яе магутна і зразумела. Таму ў Маскоўскай кансерваторыі яна абрала клас аргана.
У горад на Дзвіне прыехала па запрашэнні. Сказалі: у Полацку ёсць арган, якому патрэбны клапатлівы гаспадар. Першая сустрэча музыканта і інструмента адбылася больш за трыццаць гадоў таму. Артыстку паланілі яго гучанне і прыгажосць канцэртнай залы. З тых часоў кожную нядзелю - у Сафіі канцэрт арганнай музыкі.
Інструмент знаходзіцца бліжэй да скляпенняў сабора, а таму кожная рэпетыцыя ці канцэрт пачынаюцца з пераадолення вось такой крутой лесвіцы. Полацкі арган будавалі спецыяльна для гэтай залы. Элементы габарытнага музычнага інструмента займаюць трохпавярховую канструкцыю. Унікальная акустыка і ўдзячны слухач. Калі Ксенія Пагарэлая задумвала ў Полацку фестываль арганнай музыкі, яна ведала - праект будзе паспяховым. За 23 гады - столькі ўжо існуе гэтая культурная з’ява - у канцэртнай зале полацкай Сафіі выступілі музыканты з 25-ці краін свету.
У саборы рады і самым маленькім наведвальнікам - тут праходзяць музейна-педагагічныя заняткі, падчас якіх школьнікі знаёмяцца з каралём інструментаў. Дарэчы, Ксенія Пагарэлая - таленавіты педагог. Выкладаць пачала ў 16-гадовым узросце і па гэты дзень не пакідае гэту годную і ўдзячную працу.
Палачане адзначаюць: імя Ксеніі Пагарэлай стала брэндам старажытнага горада. Сама артыстка ўдзячная лёсу за тое, што звязала жыццё з Полацкам: ён стаў не проста любімым горадам, а месцам, дзе здзяйсняюцца мары.
