Урачы і мастацтвазнаўцы, царкоўныя дзеячы і навукоўцы. Па выніках 2015 года ўзнагароды "За духоўнае адраджэнне" з рук Прэзідэнта краіны атрымалі 5 чалавек. У ліку лаўрэатаў - настаяцель касцёла Святой Тройцы з Верхнядзвінскага раёна Віцебскай вобласці Чэслаў Курэчка.
З чалавекам, які дзеліцца душэўным цяплом і мудрасцю з кожным, пазнаёміўся Артур Смалякоў. Вось ён, Траецкі касцёл з асаблівай гісторыяй, дзе нясе службу Чэслаў Курэчка. Менавіта тут адбылася асвейская трагедыя. У лютым 1943 года фашысты сагналі ўсіх мясцовых у храм. Жыццё хацелі дараваць толькі двум ксяндзам. Але яны пайшлі ў агонь разам з прыхаджанамі.
Падчас каральнай аперацыі на Асвейшчыне немцы знішчылі больш за 300 населеных пунктаў. У Росіцы загінулі 1528 чалавек. 10 Хатыняў адразу. Ахвяру мясцовых святароў прызналі подзвігам. Антонія Ляшчэвіча і Юрыя Кашыру кананізавалі ў 1999 годзе. З таго часу ў вёсцы кожны год ладзіцца дзень памяці ксяндзоў. Паломнікі з розных краін чытаюць малітвы і любуюцца цюльпанамі вакол касцёла, якіх роўна 1528. Кветкавую алею заклаў цяперашні настаяцель, айцец Чэслаў - у памяць аб ахвярах вайны.
Ураджэнец браслаўскай зямлі Чэслаў Курэчка ў Росіцу прыехаў 8 гадоў таму. І адразу пачаў ператвараць сяло на мяжы з Латвіяй ў райскі сад. Добраўпарадкоўваць дапамагалі і мясцовыя жыхары, і прыезджыя. Пасля вайны тут шмат перасяленцаў. Большасць - праваслаўныя. Але нягледзячы на розныя канфесіі, усе яны шчыра дапамагаюць чалавеку, які сее ў вёсцы дабро.
Ксёндз упэўнены, галоўнае ў жыцці - любоў да Бога, людзей, і роднай зямлі. Менавіта гэтаму маленькага Чэслава вучыла маці, зараз гэтаму ён вучыць вернікаў. Сёлета Чэслаў Курэчка сярод тых, хто стаў лаўрэатам прэміі "За духоўнае адраджэнне".
Ксёндз запэўнівае, высокая ўзнагарода - гэта заслуга кожнага, хто яго акружае. Людзі ж, наадварот, сцвярджаюць, што без жыццёвай энергіі і аптымізму святара нічога б не было.
Па прафесіі Чэслаў Курэчка - кухар. Пра яго кулінарныя здольнасці ведаюць далёка за межамі Росіцы. Ведаюць і пра кветкавыя алеі. На тэрыторыі Траецкага касцёла больш як 300 відаў раслін. Як гаворыць ксёндз Чэслаў, гэтай зямлі больш не хочацца плакаць. Менавіта таму тут так добра растуць кветкі.
