Ён носіць імя знакамітага фатографа Сігізмунда Юркоўскага. Яго жыццё і творчасць звязаны з горадам на Заходняй Дзвіне. Экспазіцыя аб’ядноўвае прадметы, якія дазваляюць прасачыць развіццё фатаграфіі. Альбомы, часопісы, фотаздымкі, фотакамеры. У залах музея - работы самога Юркоўскага, а таксама яго сучаснікаў. З падрабязнасцямі Марына Раманоўская.
Новы музей размяшчаецца ў будынку 19-га стагоддзя. У гэты час у горадзе на Заходняй Дзвіне жыў Сігізмунд Юркоўскі. Фотасправе майстар прысвяціў усё жыццё. Праславіўся віцебскі фатограф тым, што прыдумаў шторна-шчылінную засаўку. Сваю вынаходку Юркоўскі не запатэнтаваў. Але прафесіяналы ўсяго свету прызнаюць: менавіта дзякуючы фатографу з Віцебска ў фотамастацтве адбыўся значны прарыў.
Сярод фотаработ Сігізмунда Юркоўскага - пейзажы, здымкі вуліц, храмаў, партрэты знакамітых людзей. Падчас урачыстага адкрыцця новага музея адбылася прэзентацыя ўнікальнай выставы. Яна прысвечана сям’і Медалье. На працягу некалькіх дзесяцігоддзяў Медалье быў рабінам Віцебска, сябраваў з Юркоўскім. Сям’я часта рабіла здымкі ў атэлье віцебскага фатографа. На той момант яно было лепшым у горадзе. І карысталася папулярнасцю амаль сорак гадоў.
У новым музеі прыблізна сто рарытэтных экспанатаў. Альбомы, часопісы, фотаздымкі. Таксама экспазіцыя аб’ядноўвае тры дзясяткі фотакамер. У залах музея можна ўбачыць работы самога Юркоўскага, а таксама яго сучаснікаў. Дарэчы, у гэтым годзе спаўняецца 185 гадоў з дня нараджэння майстра.
Вялікая колькасць рэпрадукцый работ віцебскага фатографа ўвайшла ў кнігу, прысвечаную яго жыццю і творчасці. Аўтару - Людміле Хмяльніцкай - удалося сабраць на старонках здымкі, якія да гэтага не публікаваліся. У кнізе - унікальныя звесткі аб вучобе ў гімназіі, яго сям’і.
Музей інтэрактыўны. Плануецца, што наведвальнікам асабліва спадабаецца назіраць за стварэннем здымкаў па тэхналогіі 19-га стагоддзя. Амаль так, як гэта адбывалася ў знакамітым фотаатэлье Юркоўскага.
