Мінск да II Еўрапейскіх гульняў павінен максімальна наблізіцца да статусу горада без бар'ераў. Неабходная інфраструктура павінна быць створана на спартыўных аб'ектах, у гасцініцах, транспарце. Даступнымі для людзей з абмежаванымі магчымасцямі стануць і такія новыя аб'екты, як Палац культуры «Лошыцкі», Беларускі маладзёжны тэатр. Агульнаеўрапейскім стандартам будзе адпавядаць і рэканструяваны стадыён «Дынама».
Надзея Сербіненка высвятляла, калі беларуская сталіца зможа быць даступнай для ўсіх.
Пяцікласніца Аня на калясцы з дзяцінства. Але вучыцца ў 12-й мінскай школе ў адным класе са звычайнымі дзецьмі. Яшчэ месяц таму выйсці з пад'езда для дзяўчынкі і яе мамы было сапраўдным выпрабаваннем. Зараз у іх распараджэнні персанальны надзейны памочнік - электрапад'ёмнік.
Такімі індывідуальнымі электрапад'ёмнікамі і пандусамі толькі летась абсталявалі каля сотні жылых дамоў Мінска. Сёлета ўсталююць яшчэ столькі ж. Паступова безбар'ерны доступ у свой пад'езд атрымаюць усе, хто мае ў гэтым патрэбу.
Са старшынёй Рэспубліканскай асацыяцыі інвалідаў-калясачнікаў мы сустрэліся на аўтамабільнай паркоўцы. Паважлівыя адносіны да правоў інвалідаў у гарадскім асяроддзі, у тым ліку на паркінгах у дварах і ля сацыяльных аб'ектаў - яшчэ адно правіла для горада без бар'ераў.
Канцэпцыю горада без бар'ераў максімальна рэалізуюць да пачатку II Еўрагульняў, каб балельшчыкі з усяго свету (у тым ліку маламабільныя) таксама змаглі стаць часткай вялікага спартыўнага свята. Усе спартыўныя аб'екты, гандлёвыя цэнтры, гарадскі транспарт павінны адпавядаць агульнапрынятым еўрапейскім стандартам даступнасці для маламабільных людзей. Больш даступнай сёлета стане і сталічная падземка.
Большасць дзвярэй у Мінскім метрапалітэне шырынёй 60 сантыметраў. Але для людзей з абмежаванымі магчымасцямі патрэбныя іншыя ўмовы. Калі чалавек на калясцы заязджае ў метрапалітэн, ён трапляе сюды, на пандус, а потым праязджае праз дзверы. І яны ўжо больш шырокія – 90 сантыметраў. Якраз такімі дзвярыма і будуць абсталяваныя станцыі ў 2018-м. Іх будзе больш.
Аб'ектаў, даступных для людзей на калясках, сёлета стане больш: стадыён «Дынама», новы корпус 4-й гарадской бальніцы.
А па вуліцах горада сёлета пачнуць курсіраваць 300 аўтобусаў з нізкай падлогай і 60 такіх жа электробусаў.
