Ваяж у свае родныя мясціны становіцца папулярным сярод беларусаў з розных краін свету. І невыпадкова. 2018-ы праходзіць пад знакам Года малой радзімы. Атрымаць асалоду ад прыроды, дзе калісьці вырас, сустрэцца з аднавяскоўцамі, наталіцца вадой з крыніцы… Адчуванні, якія нічым не заменіш. Таму і імкнуцца нашы суайчыннікі наведаць вёсачкі і гарадкі, дзе калісьці выраслі. Андрэй Ястрабаў - пра новы беларускі трэнд.
Андрэй Дараган жыве ў Швецыі, аднак не забывае пра сваю родную вёску. Гэта на сродкі яго прадзеда Восіпа Дарагана напрыканцы 19-га стагоддзя пабудавалі чыгуначную ветку Асіповічы - Старыя Дарогі са станцыяй Дараганава. Якую і назвалі ў гонар яго. Андрэй Дараган тут часты госць.
Зразумела, ніводны візіт на малую радзіму не абыходзіцца без падарункаў. Такім чынам, раённы і школьны музеі папоўнілі сотні экспанатаў з прыватных калекцый Дараганаў. Назбіралася на пяць залаў.
А яшчэ фотаздымкі, мэбля. Таксама ўпрыгажэнне музея - радавое дрэва Дараганаў - нібыта гістарычны экскурс у мінулае гэтага мястэчка.
Экскурсіі па святых месцах - заўсёды абавязковая частка візітаў на малую радзіму. Сёлета ў дар мясцоваму прыходу Лана і Андрэй Дараганы перадалі імянныя медальёны, якія належалі іх родным. І старажытныя абразы, якія доўгі час захоўваліся ў сям’і. Цяпер яны вярнуліся на радзіму.
Прадстаўнікі старажытнага роду Дараганаў сёння жывуць па усім свеце - не толькі у Швецыі, але і ў ЗША, Францыі, Расіі. І жадаюць пабываць на сваёй малой радзіме. Дзе заўсёды рады гасцям.
Зразумела, ахвотнікаў наведаць свае родныя мясціны сярод нашых суайчыннікаў значна болей. І бязвізавы парадак уезда на 5 сутак у Беларусь - таму дапамога. Паводле інфармацыі пагранкамітэта, такім чынам нашу краіну ўжо наведалі звыш 128 тысяч чалавек. Упэўнены - гэта толькі пачатак.
