Спектаклі з 10 краін свету. Міжнародны маладзёжны фестываль “М.@rt.кантакт” сабраў у Магілёве найлепшыя тэатральныя пастаноўкі сезона з краін Еўропы. Упершыню - з Аўстрыі і ЗША. У насычанай праграме фестывалю не толькі крэатыўнае прачытанне, напрыклад, класічных твораў знакамітых драматургаў, але і майстар-класы рэжысёраў. Пра самыя яркія падзеі магілёўскага фестывалю - Андрэй Ястрабаў.
За 12-гадовую гісторыю тэатральнага форуму на яго падмостках выступілі больш як 2 тысячы акцёраў. А яго спектаклі паглядзелі больш як 36 тысяч гледачоў. Ад класікі праз пластыку і да абсурду – як раз тое, што папулярна і прываблівае маладых аматараў тэатра і артыстаў.
Напрыклад, гісторыя пра Караля – рэжысёрскай лабараторыі Тэатра імя Вахтангава з Масквы. Новае і незвычайнае прачытанне знакамітай п’есы французскага драматурга Эжэна Іянескі. Расказ пра сур’ёзнае праз камічныя сітуацыі і гумар.
Цяжкасцяў перакладу ніякіх. Для тых, хто не разумее, напрыклад, артыстаў з Вены – пераклад з нямецкай у субцітрах.
Спектаклі праходзяць з аншлагамі. Без увагі не засталася і “Дарагая Алена Сяргееўна” піцерскага Тэатра юнага гледача паводле п’есы, якой больш за 30 гадоў. Пра школьнікаў, якія гатовыя на ўсё, без маралі і комплексаў, каб здаць экзамены. З’явілася і першая тэатральная сенсацыя - монаспектакль “Сіняя-сіняя” Мікалая Сцешыца – акцёра Магілёўскага тэатра лялек паводле апавядання Уладзіміра Караткевіча. Гледачы пажадалі ўбачыць яе яшчэ раз у рамках “М.@rt.кантакта”.
У гэтыя выхадныя аматарам маладзёжнага тэатра прапануюць адразу 9 спектакляў. У тым ліку - тэатраў з Вільнюса, Бабруйска і Нью-Ёрка. А у панядзелак журы гледачоў назаве пераможцу сёлетняга фестывалю.
