Іерогліфы нават у невялікіх школах кожнага раёна. Кітайскую мову з гэтага года ў Мінскай вобласці вывучае тысяча школьнікаў. І штогод гэтая лічба цяпер будзе павялічвацца. Факультатывы і ўрокі праходзяць ва ўстановах адукацыі шасці раёнаў. У Маладзечанскім іерогліфы вучні вывучаюць ужо восьмы год. А ў Смалявіцкай сярэдняй школе № 2 кітайская мова - у раскладзе ўрокаў. Вучні асвойваюць яе як першую замежную мову. Настаўнікі на такіх уроках - спецыялісты з Кітая, якія прыязджаюць да нас падвучыць рускую мову.
Падрабязней сюжэт Наталлі Кезік. На ўрок кітайскай з песнямі. Пачынаць заняткі з музычнай паўзы – аўтарскі падыход настаўніцы Жэнь Юань. У смалявіцкай школе бакалаўр універсітэта Яньшань працуе першы тыдзень. Яе вучні – пяцікласнікі. У дзяцей ужо ёсць пэўная база па кітайскай: іерогліфы яны вывучаюць трэці год. Грамату іерогліфаў вывучаюць паўсотні школьнікаў. Акрамя заняткаў ладзяць тут і традыцыйныя святы - кітайскі Новы год і Свята чырвоных ліхтароў.
Смалявіцкая сярэдняя школа № 2 - адзіная ў вобласці, дзе кітайская мова ўключана ў расклад заняткаў. Школьнікі яе вывучаюць як замежную. Урокі праходзяць тройчы на тыдзень па руска-кітайскіх падручніках. Замежныя словы праз мультымедыя вывучаюць і ў суседняй раённай гімназіі. Для факультатываў тут сабралі своеасаблівую лабараторыю кітаязнаўства – з падручнікамі і метадычнымі дапаможнікамі анлайн.
Другі год настаўнік раённай гімназіі праходзіць курсы па перападрыхтоўцы – з нуля вывучае іерогліфы, каб затым выкладаць іх вучням. Урок "Кітайская мова" ў раскладзе гэтых школьнікаў з’явіцца ў наступным годзе. Свайго настаўніка з Кітая чакаюць і ў маладзечанскай чатырнаццатай школе. Для факультатываў тут усё гатова – утульны кабінет з усходнімі матывамі і дзве сотні вучняў.
Першаадкрывальнікам кітайскай мовы для школьнікаў Мінскай вобласці стала дзясятая гімназія ў Маладзечне. Факультатыў арганізавалі восем гадоў таму. Наведваюць яго школьнікі з трэцяга па адзінаццаты клас. Настаўнік Баа Лю - бакалаўр рускай мовы з Ціхаакіянскага ўніверсітэта Кітая - тут працуе другі год.
Акрамя заняткаў па кітайскай мове гімназісты ладзяць вечарыны ў стылі Паднябеснай, ахвотна выконваюць кітайскія песні.
У цэнтральным рэгіёне кітайскую мову сёлета вывучае тысяча школьнікаў у фармаце факультатываў ці звыклых урокаў па замежнай. Класы адкрыты ў шасці раёнах вобласці. І надалей колькасць дзяцей з веданнем кітайскай толькі павялічыцца: пачынаць вучыць іерогліфы штогод будуць мінімум сто школьнікаў.
