Мастачка з Брэста карціны стварае з акрылавых фарбаў і эпаксіднай смалы

16 Чэрвеня 2018

Тэхніка флюід-арт з’явілася нядаўна, але эксперыментальныя мастакі ўсё больш цікавяцца незвычайнымі спосабамі стварэння "касмічных" карцін.

У майстэрню, якая нагадвае хімічную лабараторыю, зазірнула Вікторыя Патоня. Замест традыцыйных пэндзляў у руках майстра драўляныя палачкі і мініяцюрныя піпеткі. Фарбы ў тэхніцы флюід-арт разбаўляюцца сіліконам, што дазваляе ім на карціне існаваць незалежна, нібы ў ячэйках. Палатно замяняе драўляная ці пластыкавая аснова, якая абавязкова падчас творчага працэсу знаходзіцца ў гарызантальным становішчы. Майстэрня Алы Выкачка-Федасюк нагадвае кабінет хіміка, а не мастака. Ды і сама аўтар падкрэслівае: для яе гэта эксперыментальная тэхніка, з элементамі медытацыі.

Флюід-арт - тэхніка новая для мастакоў ва ўсім свеце. У Расіі і Беларусі толькі набывае папулярнасць. Глянец карцінам надае смала. Ала пазнаёмілася з творчасцю нямецкага майстра праз Інтэрнэт і паспрабавала намаляваць некалькі работ самастойна.

Эпаксідная смала - матэрыял празрысты, сам па сабе не мае колеру. Таму майстар выкарыстоўвае дадатковыя "фарбавальнікі". Сярод інгрэдыентаў нават лакі для манікюру, бліскаўкі і камяні. Так нараджаюцца ззяючыя карціны.

Напрыклад, для гэтага дыптыха спатрэбіліся паўтара літра смалы. Сюжэт - горная парода ў разрэзе з эфектам 3D. Майстар падсвятліла карціны святлодыёдамі, ад чаго карціны зазіхацелі яшчэ больш. Работы з акрылавых фарбаў і эпаксіднай смалы ствараюцца ў некалькі этапаў. Матэрыялы павінны высахнуць. Дарэчы, Ала выкарыстоўвае дэкаратыўную смалу, а не будаўнічую. Гэта дазваляе не баяцца, што матэрыял закіпіць.

Азёры, каньёны, горныя пароды… Галоўны герой работ - прырода. Мастачка пад псеўданімам Ала Броска марыць аб уласнай выставе. Каб з незвычайнай і новай тэхнікай у мастацтве змаглі пазнаёміцца значна больш людзей.