Азеляніцелі абласнога цэнтра рыхтуюцца да маштабных эксперыментаў. Так, упершыню будуць выкарыстоўвацца не маладыя саджанцы, а ўжо дарослыя дрэвы. Пасадкі правядуць па новай методыцы. Вынікам павінна стаць 90-працэнтная выжывальнасць раслін у гарадскіх умовах. Сакрэты аграномаў выведала Ганна Кавалёва.
Гэта прадпрыемства - галоўны азеляніцель Гомеля. Зараз тут рыхтуюць пасадачны матэрыял да вясны. Акрамя туй - ліпы, ясені і клёны. З загазаванасцю спраўляюцца без праблем. І ўсё ж выжывальнасць дрэў у гарадскім асяроддзі заўсёды была сярэдняй. Павысіць яе да 90% сёлета паспрабуюць эксперыментальным метадам: упершыню высадзяць буйнамеры - дарослыя 10-гадовыя дрэвы. Выкопваць і перамяшчаць на новае месца іх будуць разам з зямлёй. Для гэтага набылі спецыяльную тэхніку.
Зялёныя зоны Гомеля папоўняцца на 14 тысяч дрэў. З'явяцца і экзатычныя экземпляры - ліянавідныя гліцыніі і катальпы. Яшчэ адна навінка - гіпаалергенныя віды яблынь.
Увогуле асаблівую ўвагу сёлета звернуць на маладыя мікрараёны. Туды кінуць асноўныя сілы па азеляненні. Па-ранейшаму ў фокусе і магістральныя вуліцы з вялікім патокам транспарту, і зоны адпачынку.
Акрамя вясновых суботнікаӯ, гомельскія аграномы чакаюць і вясновых свят. Да 8 сакавіка падрыхтавалі больш за 46 тысяч кветак. Сярод іх цюльпаны, крокусы і гіяцынты.
Для зручнасці гамяльчан напярэдадні свята гэтыя кветкі будуць прадаваць не толькі ў спецыялізаваных магазінах - гандлёвыя міні-пункты з'явяцца прама на вуліцах горада: на прыпынках, плошчах і нават на буйных прадпрыемствах. Акрамя гэтага ўжо зараз аграномы вырошчваюць расліны для гарадскіх кветнікаў. У арсенале 500 тысяч відаў, у тым ліку і новыя разнавіднасці.
Пакуль ландшафтныя дызайнеры ствараюць вобразы будучых кампазіцый, затым з паперы ідэі перанясуць на гарадскія вуліцы. Квітнеючым горадам Гомель стане ўжо да 25 красавіка.
