Экалагічнае падарожжа на экалагічным транспарце: новы маршрут з'явіўся ў Белавежскай пушчы

23 Мая 2020
Яго распрацавалі спецыяльна для электраскутараў і самакатаў. Турысты змогуць праехаць некалькі дзясяткаў кіламетраў па старажытным лесе, убачыць стагадовыя дубы і маленькія вёскі. 

Сярод першых па сцежцы праехала наш карэспандэнт Марыя Тройніч.

З ветрыкам па лесе! Уражанняў ад Белавежскай пушчы ў турыстаў цяпер яшчэ больш. Электрасамакат едзе хутчэй за веласіпед, таму маршрут зрабілі доўгім. На старце выдаюць карту з нумарам тэлефона - на экстранны выпадак. Бо ў дрымучым лесе лёгка заблукаць. 

Даўжыня маршруту - 30 кіламетраў. Для нявопытных веласіпедыстаў адлегласць немаленькая. А вось на электрасамакаце такое падарожжа здужае кожны. Хуткасць такога самаката - 25 кіламетраў за гадзіну. Па маршруце  праклалі асфальт, таму падарожжа будзе камфортным. Дарэчы, на гэтым месцы падчас Першай сусветнай вайны была чыгунка, па якой вазілі лес у Еўропу.

На карце маршруту - пушчанскія славутасці. Галоўная з іх, вядома, унікальная флора і фаўна запаведніка. Турысты праязджаюць міма дрэў, якім больш за дзвесце гадоў.

Акрамя векавых дубоў па дарозе можна палюбавацца і прыгажосцю мясцовых вёсачак. Схаваныя сярод лесу населеныя пункты зусім малыя. У некаторых усяго па тры-чатыры хаты. Раней па Белавежскай пушчы былі толькі маршруты на веласіпедах. Праехаць у запаведную зону на машыне можна толькі па спецдазволе. А вось экалагічнаму электратранспарту далі зялёнае святло

Пакуль для падарожжа па новай экасцяжынцы трэба браць з сабой свае электрасамакаты і скутары. Але ў будучыні ў нацпарку могуць адкрыць пракат. А на самой сцежцы з'явяцца новыя прыпынкі і пункты для агляду.