З лютага тут распачалі кампанію па азеляненні і ўжо высадзілі больш за 1000 дрэў. Акрамя камунальных службаў, пакінуць "зялёны след" могуць і гараджане. Для гэтага ў горадзе працягваецца акцыя "Тысяча дрэў да тысячагоддзя Брэста". Ініцыятыву падтрымала і наша здымачная група.
Сёлета горад пачалі азеляняць як ніколі рана. Яшчэ ў лютым. Праўда, каб саджанцы прыжыліся, неабходны час. Актыўна пасадка дрэў ідзе ў парку Тысячагоддзя. Ён быў закладзены тры гады таму. На гэтым тыдні свой "зялёны след" тут пакінулі і журналісты. Замест дыктафонаў і блакнотаў прадстаўнікі мас-медыя ўзброіліся рыдлёўкамі. І з вялікім энтузіязмам ўзяліся за справу.
Наша здымачная група таксама не засталася па-за кадрам. Цяпер на першай у парку бярозавай алеі ёсць дрэва Агенцтва тэленавін. Упрыгожаць ланшафт і ліпы. Іх пасадзілі 10 сем’яў - удзельнікі рэспубліканскага экапраекта "Парк сямейных дрэў". Творчыя, маладыя і шматдзетныя сем’і далі старт добрай сямейнай і, магчыма, нацыянальнай традыцыі.
У юбілейны год на вуліцах, лесапарках і скверах плануюць высадзіць амаль 6 тысяч дрэў і 20 тысяч саджанцаў сасны. На зялёнай карце дамінуюць больш устойлівыя да гарадскога асяроддзя пароды дрэў.
Да 1000-годдзя ў Брэсце з’явіцца шмат зялёных куточкаў. Рэаніміруюць і стары гарадскі сад, які, дарэчы, з’яўляецца гістарычнай каштоўнасцю. Яму амаль два стагоддзі! А ўжо гэтым летам ён зноў стане месцам адпачынку гараджан.
Парк мае багатую гісторыю. Яго цэнтрам стаў камень-валун. 20-тонны волат быў знойдзены ў возеры пад Брэстам. Ад яго будуць разыходзіцца прамяні-дарожкі. Ёсць задумка на камені выбіць карту і надпіс. Дакладнай ідэі няма, таму прапаноў чакаюць і ад гараджан.
Акцыя "Тысяча дрэў да тысячагоддзя Брэста" толькі набірае абароты. Дарэчы, упрыгожаць вуліцы і ў тры разы больш кветак. Акцэнты зробяць на вертыкальныя клумбы. Так што горад не на жарт прэтэндуе стаць самым зялёным абласным цэнтрам краіны.
