Бязвізавая зона стала большай. Як у глыбінцы рыхтуюцца сустракаць гасцей

З 10 лістапада для замежных турыстаў адкрыюць яшчэ пяць раёнаў краіны. У сілу ўступае адпаведная пастанова Савета міністраў. Бязвізавыя зоны Гродзенскай і Брэсцкай абласцей аб'ядналі. І зараз падарожнічаць па іх без візы можна на пяць дзён даўжэй: 15 замест дзесяці. Нашы карэспандэнты даведаліся, як у глыбінцы рыхтуюцца сустракаць бязвізавых гасцей. 

Музей Адама Міцкевіча ў Навагрудку - адзін з самых папулярных  турыстычных аб'ектаў рэгіёна. На радзіму знакамітага паэта прыязджаюць госці з усёй Еўропы. Толькі з пачатку года тут правялі каля 700 экскурсій для 30 тысяч замежных турыстаў. Унікальныя экспанаты, якія належаць Міцкевічу, тут збіраюць на працягу 80 гадоў. Рукапісы, прадметы інтэр'ера, асабістыя рэчы расказваюць, як жыў і ствараў класік сусветнай літаратуры.

Здзіўляць турыстаў гатовы і ў раёнах, якія заўтра толькі адкрыюцца для індывідуальных турыстаў. У Лідзе цэнтрам прыцягнення гасцей стане старадаўні замак. Тут праходзяць міжнародныя музычныя фестывалі. Правялі вялікую працу і па паляпшэнні турыстычнай інфраструктуры.

Цяпер дзве бязвізавыя зоны - гродзенскую і брэсцкую - аб'ядналі ў адну. У Брэсцкім рэгіёне, акрамя культурных славутасцяў, стаўку робяць і на медыцынскі турызм. Жыхарка Германіі Кацярына Маркварт праводзіць у Беларусі ўжо другі свой адпачынак. Сёлета абрала санаторый каля  Брэста.

У Германіі жанчына працуе настаўнікам рускай мовы, таму цяжкасцяў перакладу ў нашай краіне не адчувае. У санаторый Кацярына прыехала на аздараўленчыя працэдуры. Іх у здраўніцы больш за 200. Міжсезоння тут не бывае: у санаторыі круглы год хапае гасцей. А каб іх стала яшчэ больш, адміністрацыя вырашыла напроста супрацоўнічаць з замежнымі турфірмамі. І атрымала сертыфікат на права афармлення дакументаў для наведвання Беларусі па бязвізу.

Сёлета ў Брэсцкай вобласці адзначаюць пік папулярнасці медыцынскага турызму. Каб разнастаіць аздараўленчы адпачынак, гасцям прапануюць экскурсійныя туры па рэгіёне. У спісе топавых славутасцяў - Брэсцкая крэпасць.

Паводле падлікаў спецыялістаў, за гэты год мемарыяльны комплекс наведаюць паўмільёна гасцей. У паўтара раза больш, чым насельніцтва Брэста. І гэта толькі наведвальнікі музеяў і афіцыйныя дэлегацыі. Турыстаў прывабліваюць усё новымі аб'ектамі: так, у крэпасці пачалі будаваць яшчэ адзін музей.

Бязвізавы турыст праводзіць у нашай краіне ў сярэднім два дні. Плануецца, што пашырэнне зоны не толькі павялічыць паток замежных гасцей, але і натхніць іх пагасцяваць у нашай краіне больш доўга.