Будучае Раство звязана не толькі са старажытнымі сакральнымі традыцыямі нашага народа, але і з падзеямі, якія ўжо з нашага часу, але без якіх гэтыя зімовыя дні ўявіць проста немагчыма. Адна з такіх падзей - Калядны міжнародны турнір аматараў хакея, які стартуе ўжо заўтра. 8 дружын сыдуцца на мінскім лёдзе, каб запаліць лядовыя арэны яркімі эмоцыямі і незабыўнымі момантамі. Рэпартаж Алены Гарэльчык.
Аляксей Страхаў закідваў за хабараўскі "Амур", пайграў у чэмпіянатах Беларусі і Усходне-еўрапейскай хакейнай лізе, не аднойчы выйграваў медалі і станавіўся прызёрам гэтых турніраў. Паралельна атрымліваў запрашэнне ў нацыянальную зборную, дзе станавіўся лепшым бамбардзірам. Страх, як далі мянушку яго аднаклубнікі па "Віцебску", на пляцоўцы не прывык адбываць нумар. Калі гуляць у хакей, то гуляць на мяжы магчымасцяў. Аднойчы арганізм даў зразумець, што прафесійную кар'еру час заканчваць, але жыць без хакея вельмі цяжка. Для такіх як Аляксей і прыдумана начная хакейная ліга, дзе аматары за свае грошы займаюцца сваім хобі, калі лёд вольны ад навучальна-трэніровачнага працэсу. А галоўным турнірам для аматараў з'яўляецца Калядны міжнародны.
Атмасферу ствараюць балельшчыкі. Больш за за дзясятак гадоў яны прывыклі, што ў Мінск пад Раство прыязджаюць зоркі нядаўняга мінулага і вядомыя хакейныя кіраўнікі. На найважнейшыя матчы білетаў не дастаць - гэта таксама асаблівасць нашага турніру аматараў.
12-ы Калядны турнір возьме старт ужо ў панядзелак. Удзельнічаюць восем каманд. У групе з беларусамі гэтым разам Аб'яднаныя Арабскія Эміраты, славакі і швейцарцы. Паралельна будуць ваяваць немцы, расіяне, фіны і шведы. Тым, хто прывык глядзець шмат хакея, гэтым разам пашанцавала - турнір прымаюць дзве пляцоўкі "Чыжоўка-Арэны". Усё ў адным месцы.
Першымі ў Мінск прыбылі хакеісты з Аб'яднаных Арабскіх Эміратаў. Сярэдні ўзрост гэтай каманды самы нізкі. Гульню на лёдзе ў гэтай багатай краіне толькі пачынаюць развіваць, таму разглядаюць Калядны турнір як вопыт для нацыянальнай зборнай. А ранні прыезд - гэта яшчэ і дадатковы дзень для акліматызацыі.
84-гадовы немец Эдуард Бшайд - адна з самых каларытных персон на Калядным турніры. У такім шаноўным узросце ён гуляе ў хакей, калі пераважная большасць яго аднагодкаў забылі пра такі актыўны адпачынак. Ён напэўна не стане лепшым бамбардзірам, магчыма, ён выйграе медаль, але зробіць значна большае - пакажа моладзі, як правільна адносіцца да свайго арганізма.
А вось славакі прыбылі ў Мінск па вынік і не ўтойваюць гэта. На працягу некалькіх гадоў запар у іх чацвёртыя месцы - самыя крыўдныя ў спорце.
Беларусы былі і ёсць галоўныя фаварыты турніру. 8 разоў каманда Прэзідэнта выйгравала кубак. Тройчы гэта рабілі расіяне. Нешта падказвае, што гэтым разам фінал будзе не такі прадказальны.
Хакей хакеем. Ён толькі падстава для сустрэчы старых сяброў. Іншаземцы з задавальненнем прымаюць запрашэнне прыехаць у Беларусь, з задавальненнем удзельнічаюць у каляднай традыцыі. Кожны год хакеісты наведваюць дзіцячыя дамы і прыносяць падарункі дзецям з цяжкім лёсам. Гэтым разам каманды ўжо чакаюць у Радашковіцкім раёне.
