Лейтматывам абмеркавання з кіраўніком КДБ і з кіраўніком Дзяржкамітэта судовых экспертыз стала захаванне справядлівасці пры разборы самых складаных спраў.
Так, Андрэй Швед расказаў, што сёння поўнасцю вырашана праблема аператыўнасці экспертнага суправаджэння барацьбы са злачыннасцю. Пяць гадоў таму ў выніку рэформы ў асобную структуру было вырашана выдзеліць судовую экспертызу. Гэта дазволіла павысіць эфектыўнасць працы і вырашыць шматгадовыя праблемы - ад недахопу фінансавання і раз'яднанасці да зносу абсталявання і кадравых пытанняў. Тэхнічнае пераабсталяванне зрабіла працу экспертнай службы больш дзейснай. Даследаванні праводзяць хутка, без чаргі - сфарміраваная база дапамагае раскрываць нават злачынствы мінулых гадоў. Штогод - звыш 340 тысяч судовых экспертыз. Ад працы спецыялістаў ведамства залежыць не проста пошук ісціны ў крымінальных, адміністрацыйных або эканамічных справах, але часта лёсы і жыцці людзей.
Асаблівая роля ў барацьбе са злачыннасцю ў яшчэ аднаго ведамства - КДБ гарантуе бяспеку па ўсіх напрамках: ад эканамічнай да барацьбы з тэрарызмам і карупцыяй. Самыя гучныя злачынствы такога характару на асабістым кантролі Кіраўніка дзяржавы. Узровень беларускіх спецыялістаў дазваляе разбірацца з самымі складанымі і заблытанымі справамі, што гаворыць аб якасці працы сілавога блока краіны.
Камітэт дзяржбяспекі расследаваў больш за 300 карупцыйных спраў. Старшыня КДБ Беларусі даў даклад па выніках года Кіраўніку дзяржавы. А пасля падзяліўся падрабязнасцямі гутаркі ў інтэрв'ю праграме "Размова ў Прэзідэнта". Гэта праект, у якім дзяржкіраўнікі высокага рангу як эксперты і прафесіяналы сваёй справы аналізуюць трэнды развіцця самых розных сфер нашага жыцця. Валерый Вакульчык расказаў падрабязнасці найбольш гучных карупцыйных злачынстваў. Так, сталі вядомы нюансы справы БелABM і крадзяжоў у лясной гаспадарцы.
Сёлета 24 студзеня з доказамі злачынства быў затрыманы адзін з кіраўнікоў лесагаспадарчай галіны Віцебскай вобласці. Ланцужок следства прывёў да раскрыцця маштабнай карупцыйнай схемы, па якой лесаматэрыялы вывозіліся за межы Беларусі пад выглядам танных дроў, за мяжой афармляліся як прадукт высокай якасці і зноў прадаваліся ў нашу краіну. Урон эканоміцы ацэньваецца дзясяткамі і сотнямі тысяч еўра за год.
Узбуджаны дзве крымінальныя справы па фактах дачы хабараў і 13 спраў - па фактах іх атрымання. Затрыманы 2 прадпрымальнікі і 12 службовых асоб Міністэрства лясной гаспадаркі. Патрабаванне Прэзідэнта па выніках даклада - распрацаваць празрыстыя схемы рэалізацыі лесу за мяжу.
