Дакумент дапоўнены з улікам усіх тэндэнцый, якія сёння варта ўлічваць, умацоўваючы абараназдольнасць дзяржавы. У прыватнасці, у новай ваеннай дактрыне растлумачваецца што такое каляровыя рэвалюцыі і гібрыдныя войны, а таксама выразна прапісана як з імі змагацца. Ці памяняецца беларуская армія з выхадам у свет абноўленага дакумента? Новую ваенную дактрыну вывучаў Юрый Шаўчук.
Для таго каб сёння парушыць стабільнасць і парадак у дзяржаве, ужо не патрэбныя вось такія ваенныя машыны. Танкі, БТР, браневікі - усё гэта ўжо не так актуальна. На змену ваеннай тэхніцы прыйшлі іншыя сродкі вядзення войнаў. І хай не такія эфектныя, затое не менш эфектыўныя.
Гібрыдныя войны і каляровыя рэвалюцыі - паняцці, аб якіх да пачатку 21 стагоддзя мала хто чуў, але потым усе ўбачылі іх наступствы. Практычна ўсе сцэнарыі за апошнія 15 гадоў былі, нібы змаляваныя пад капірку. Спачатку інфармацыйнае супрацьстаянне. Віртуальныя прасторы рэгіёнаў апускаліся ў адкрытую рэвалюцыйную агітацыю і прапаганду па звяржэнні ўлады. У выніку ўсё прыводзіла да таго, што інфармацыйная вайна трансфармавалася ў рэальныя баявыя дзеянні.
З прыходам новых тэхналогій па распальванні канфліктаў паняцце "войны" як такое памяняла сваё звыклае значэнне. Сёння стэрэатыпнае ўяўленне аб бітвах на франтах сышло далёка ў акопы, а на авансцэну выйшлі іншыя метады. У сувязі з гэтым перад дзяржавамі паўстала задача выпрацаваць тыя механізмы, якія прадухіляць магчымыя пагрозы звонку па дэстабілізацыі сітуацыі ў краіне. Адным з такіх механізмаў у Беларусі стала новая ваенная дактрына. Дакумент сабраў у сабе тыя змяненні, якія адбыліся ў формах і спосабах вядзення ўзброенай барацьбы.
Дзеючая ваенная дактрына была распрацаваная 14 гадоў таму. З тых часоў змянілася шматлікае, у тым ліку і асноўныя паняцці, якія вызначаюць спосабы вядзення войнаў. Усе гэтыя азначэнні зараз знойдуць адлюстраванні ў новым дакуменце. Бо для таго, каб ведаць, як змагацца са злом, у першую чаргу трэба разумець што яно з сябе ўяўляе. Дакумент улічвае і магчымасць экспарту каляровых рэвалюцый. Нязменным у дактрыне застаўся толькі абарончы характар і здольнасць супрацьстаяць любым выклікам і пагрозам.
Новая ваенная дактрына Беларусі стала больш аб'ёмнай па форме, але комплекснай па змесце. Дакумент складаецца з дваццаці шасці старонак. Некалькі момантаў з'явіліся ўпершыню. Напрыклад, 2-і раздзел, дзе зараз будуць прапісаныя асноўныя тэрміны і іх азначэнні. У дзеючай ваеннай дактрыне такі раздзел адсутнічае. Паняційны апарат у праекце ўдакладнены і развіты. Яшчэ адзін раздзел, якога раней не было, - №10. Тут вызначаныя і адкарэкціраваныя задачы і асноўныя кірункі развіцця абароннага сектара эканомікі, а таксама парадак ажыццяўлення міжнароднага ваенна-тэхнічнага супрацоўніцтва з улікам сучасных тэндэнцый развіцця ўзбраення.
Як прыклад - распрацоўка беларускіх збройшчыкаў - ракетная сістэма залпавага агню "Паланэз". Узор ужо прайшоў выпрабаванні і атрымаў самыя высокія ацэнкі ваенных экспертаў.
У раздзеле, прысвечаным абароннаму сектару эканомікі, вызначаныя задачы па развіцці ваенна-прамысловага комплексу як высокатэхналагічнага і шматпрофільнага сектара. Сучасныя канфлікты дыктуюць свае патрабаванні да зброі і тэхнікі. Узбраенне павінна быць дакладным, надзейным і мабільным. Толькі з такім арсеналам сёння можна быць у бяспецы.
У сувязі з гэтым пасля выхаду ў свет беларускай ваеннай дактрыны спецыялісты зоймуцца абнаўленнем аналагічнага дакумента Саюзнай дзяржавы.
Зараз праект ваеннай дактрыны знаходзіцца ў парламенце, дзе з ім знаёмяцца дэпутаты. У Палату прадстаўнікоў дакумент паступіў пасля таго, як яго адобрыў Прэзідэнт па выніках пасяджэння Савета бяспекі. Плануецца, што разгледзяць парламентарыі яго ўжо на вясновай сесіі, якая стартуе ў пачатку красавіка.
