Пераадолець усе стыхіі дзеля выратавання дзяўчыны. Літаральна на днях (у пятніцу) у кінапавільёне ў Мінску прайшлі здымкі кліпа на песню "Time". Менавіта з ёй Юзары і Маймуна прадставяць Беларусь на "Еўрабачанні" ў Вене. Такі відэаролік - гэта не абавязковая ўмова Еўрапейскага Вяшчальнага Саюза для конкурсу, аднак яркае відэа дае дадатковыя шанцы займець прыхільнікаў па ўсёй Еўропе. Ужо з сярэдзіны сакавіка кліпы ўдзельнікаў "Еўрабачання" будуць паказвацца на нацыянальных каналах усіх 40 краін - удзельніц конкурсу.
Што ж адбывалася на здымачнай пляцоўцы ў Мінску, падгледзеў Яўген Перлін.
Калі тэатр пачынаецца з вешалкі, то кліп Юзары і Маймуны - з бегавой дарожкі. Больш як тры гадзіны на пляцоўцы спеваку давялося займацца фітнесам. Дубль не адзін, а хуткасць - каля 20 кіламетраў за гадзіну.
Юзары паўстане ў вобразе казачнага і нават містычнага персанажа. Эльф нашага часу. Герой з іншай рэальнасці. І ён павінен выратаваць у фінале Маймуну.
Рэжысёр Дзмітрый Сямёнаў упэўнены, што для выратавання Маймуны Юзары трэба прайсці праз усе стыхіі. Кожную гадзіну на пляцоўцы ў павільёне змянялася надвор'е. Спачатку дым, потым снег, агонь і вецер.
Дзмітрый Сямёнаў, рэжысёр кліпа Uzari & Maimuna: "У нас тут усё складана. Лёгкіх рэчаў няма. У нас 11 тон пяску ляжыць за спінай. Потым гэта прыбіраць яшчэ трэба. І наогул мы будзем тут людзей засыпаць пяском". 
Паводле сюжэта кліпа, Юзары бяжыць па вялікай пустыні, па пяску, якім засыпала дзясяткі людзей. Для гэтага выкарыстоўваюцца вось такія бутафорскія рукі. У здымках кліпа ніхто не пацярпеў.
Снег, натуральна, у павільёне выкарысталі штучны. У адрозненне ад усяго астатняга. І тут у рэжысёра паўсталі сумненні. Не верыць! Прыйшлося паскорыць стыхію і нават самому сесці за цялежку з камерай.
Здымачны дзень разлічылі на суткі. І пакуль Юзары з самай раніцы працаваў на пляцоўцы, Маймуне дазволілі паспаць да абеду.
Maimuna, прадстаўніца Беларусі на "Еўрабачанні-2015":
"Я, насамрэч, прыехала толькі нядаўна, пасля абеду. І здымацца будзем да самай ночы. Прыкладна я ўяўляю, што гэта будзе. Натуральна, іграць трэба на скрыпцы. Як заўсёды. Але будуць нейкія нюансы".
Ні артысты, ні здымачная група не выдаюць фінал кліпа. Пакуль ён трымаецца ў сакрэце. Але ўжо ясна, што кульмінацыяй відэа стане сцэна з вялізнай дэкарацыяй.
У кліпе гледачы ўбачаць і вось гэты пакуль яшчэ не зусім зразумелы прадмет. Гэта вялізны пясочны гадзіннік - вышынёй 3 метры. Усярэдзіне ў іх будзе знаходзіцца Маймуна са сваёй скрыпкай.
Здымкі кліпа Юзары і Маймуны скончыліся далёка за поўнач. Але рэжысёр задаволены. Зараз час мантажу і апрацоўкі. Прэм'ера відэа адбудзецца ў сярэдзіне сакавіка. Як мінімум да сустрэчы кіраўнікоў дэлегацый конкурсу. Яна пройдзе 16 сакавіка ў Вене.
