"Скрыня Пандоры" і "фінансавы камінг-аўт". Так украінскія СМІ назвалі публікацыю электронных дэкларацый мясцовых палітыкаў і дзяржслужачых. Даць справаздачу аб маёмасці народным выбраннікам прыйшлося пасля патрабаванняў МВФ і ЕС. Тое, што ўкраінская эліта жыве, мякка кажучы, нядрэнна, ніколі не было сакрэтам для выбаршчыкаў. Але падрабязнасці аб багацці міністраў, дэпутатаў, пракурораў і суддзяў усё роўна шакіравалі грамадства. Самым багатым палітыкам чакана аказаўся Пётр Парашэнка - некалькі кватэр, 42 гектары зямлі, 30 мільёнаў долараў на рахунках. Але пра багацце прэзідэнта было вядома даўно. Ды і зарабіў ён яго, займаючыся бізнесам да ўступлення на пасаду.
А вось адкуль узяліся паўтара мільёна долараў, прычым наяўнымі, у прэм'ер-міністра Гройсмана - загадка, на якую не можа адказаць нават ён сам. Адзначым, апошнія 10 гадоў Уладзімір Гройсман працаваў на дзяржслужбе. Або, напрыклад, малавядомы дэпутат Вячаслаў Канстанціноўскі. Ён задэклараваў каля 15 мільёнаў долараў. Таксама наяўнымі - дзве поўныя ванны купюр між іншым. Увагу ўкраінцаў прыцягнула і справаздача Юліі Цімашэнкі. У экс-кіраўніка Кабміна няма ні зямлі, ні машын, ні дома. Затое ў мужа "жалезнай Юлі" 9 кампаній і сотні тысяч долараў на рахунках.
Публікацыя дэкларацый выявіла сумны факт - украінскія ўлады не давяраюць грыўні і банкаўскай сістэме краіны. Грошы ў асноўным захоўваюць у валюце і пад матрацам. Адны толькі народныя дэпутаты задэкларавалі 260 мільёнаў наяўных долараў. СМІ падлічылі, што гэта чвэрць гадавых выдаткаў сталічнага бюджэту, капітальны рамонт 250-ці кіламетраў дарог або 50 сучасных танкаў "Апора". Ва ўкраінскіх СМІ нават загаварылі пра тое, што народныя выбраннікі спецыяльна павялічылі памер багацця ў дэкларацыі, каб прыкрыць будучыя махінацыі.
