Як і ў турызме, так і ў спорце без матэматыкі нікуды. Колькасць гасцей, якія прыехалі, вынікі атлетаў - безумоўны крытэрый поспеху ў гэтых сферах. Зрэшты, такое сцвярджэнне справядліва і для краіны ў цэлым. Калі абярнуцца і паглядзець на 2018, то можна сказаць, што для беларускай эканомікі ён быў дастаткова добрым. Што паклалі ў скарбонку дасягненняў?
Фінансы ў Беларусі стабільныя, гэта нядрэнны зачын для 2019 года. Яшчэ больш упэўнена павінен адчуць сябе беларускі бізнес. З 1 студзеня скасаваны ўказ аб ілжэпрадпрымальніцтве.
Далей больш. У Мінпрацы на тыдні аб’явілі, што ў краіне плануюць павялічыць памер пенсій да 40 % ад сярэдняй зарплаты, г.з. гэта больш за 400 рублёў па выніках года. Але гэта аб справах унутраных, а вось беларускім турыстам, якім спакою не дае мора Эгейскае і турэцкія пляжы, наадварот прыйдзецца крыху раскашэліцца.
У Турцыі ўвялі падатак на бяспеку. Сума збору невялікая, але абавязковая - паўтара еўра з чалавека. Заплаціць яго прыйдзецца ў аэрапорце.
З якімі яшчэ лічбамі будзем жыць у 2019, ведае мая калега Вераніка Бута.
Вызначальныя дакументы, прынятыя ў канцы мінулага года, (гэта і бюджэт, і праграма сацыяльна-эканамічнага развіцця) арыентуюць нас на рост зарплат у 2019 і больш істотную аддачу ад рэальнага сектара эканомікі. Больш падрабязна пра тое, чаго чакаць нам сёлета ў фінансавым плане - у нашай рубрыцы "Лічбы года".
На колькі ў 2019 павялічацца цэннікі ў магазінах і пацяжэе наш прадуктовы кошык? Улады прагназуюць, рост цэн на тавары і паслугі будзе ў межах 5 %. Менавіта гэтая лічба закладзена ў рэспубліканскім бюджэце. Такая ж інфляцыя запланаваная і на 2020.
А зараз пра тое, якіх даходаў чакаць у гэтым годзе. Такім чынам, сярэдняя зарплата ў 2019, згодна з прагнозамі, складзе 1025 рублёў. Прынамсі, такога плана абяцаў прытрымлівацца ўрад. Плануюць падняць зарплаты бюджэтнікам - іх даходы павінны вырасці да 810 рублёў за месяц. Мінімальная планка таксама традыцыйна была паднятая ў пачатку года - 330 рублёў.
Павысяцца ў 2019 і пенсіі. Скажам, пенсіі па ўзросце сёлета дададуць 14 %. А вось выходзіць на заслужаны адпачынак беларусы будуць на паўгода пазней. Пенсіённы ўзрост для мужчын - 61,5, для жанчын 56,5 года.
А зараз прагноз для тых, хто ў думках аб працаўладкаванні. Сёлета ў Беларусі разлічваюць стварыць каля 68 тысяч новых рабочых месцаў. Больш за ўсё свежых вакансій з'явіцца ў сталіцы і ў Мінскай вобласці. Узровень агульнага беспрацоўя не павінен перавысіць 5 %.
Ключавы параметр нашай эканомікі - стаўка рэфінансавання. Яна вызначае і кошт крэдытаў, і прыбытковасць укладаў. Асаблівых змяненняў тут не чакаюць. Згодна з разлікамі Нацбанка, палову працэнтнага пункта стаўка рэфінансавання можа страціць да канца года, але толькі пры ўмове стабільнай працы ўсёй фінансавай сістэмы. Стаўкі па новых крэдытах у рублях чакаюцца на ўзроўні 10,5-11 %.
Сёлета Нацбанк гатовы адмовіцца ад рэгулявання гранічнага ўзроўню працэнтных ставак і дазволіць беларусам, пачынаючы з сакавіка, свабодна адкрываць рахункі ў замежных банках. Размова пра бягучыя рахункі. Для дэпазітаў, як і раней, патрэбен дазвол.
Сёлета чакаюць у беларускай сталіцы вялікую колькасць іншаземцаў. Толькі паводле папярэдніх ацэнак, на Еўрапейскія гульні ў Мінск прыедуць не менш за 30 тысяч турыстаў і каля 10 тысяч гасцей, якія так або інакш звязаныя з правядзеннем спаборніцтваў (прэса, суддзі і, вядома, самі спартсмены).
У новым 2019 годзе фінансавыя аналітыкі не чакаюць глабальных узрушэнняў на фондавым рынку, паўтор глабальнага эканамічнага крызісу таксама малаверагодны. Нестабільныя цэны на нафту, а таму, прадракаюць, паліва на працягу года будзе працягваць то даражэць, то таннець на некалькі капеек.
Такія эканамічныя прагнозы на 2019.
