У працоўным графіку Прэзідэнта на тыдні было адразу некалькі сустрэч з дыпламатамі, якія папярэднічаюць перамовам на вышэйшым узроўні. Плюс гэта добрая магчымасць акінуць поглядам увесь пласт двухбаковага супрацоўніцтва.
Так, аб неабходнасці рэвізіі адносін гаварылі на сустрэчы з кіраўніком эквадорскай дыпламатыі. Марыя Фернанда Эспіноса Гарсес раней ужо была ў Мінску, праўда, у статусе міністра абароны. Прэзідэнт канстатаваў: у Беларусі з Эквадорам склаліся добрыя палітычныя адносіны, падобныя пазіцыі па сусветным парадку. Мінск і Кіта канструктыўна супрацоўнічаюць ва ўсіх міжнародных арганізацыях, асабліва ў ААН. Эквадор - тая дзяржава, абапіраючыся на якую можна развіваць супрацоўніцтва і з іншымі краінамі Лацінскай Амерыкі. Асновай жа дарожнай карты дзвюх дзяржаў павінна стаць гандлёва-эканамічнае супрацоўніцтва.
І яшчэ адзін вектар супрацоўніцтва - ужо ва Усходняй Азіі. На ўсебаковае развіццё кантактаў Беларусь настроеная і з Кітаем. Стратэгія адносін Мінска і Пекіна, магчымыя праблемы развіцця індустрыяльнага парка "Вялікі камень" і падрыхтоўка маючага адбыцца саміту Шанхайскай арганізацыі супрацоўніцтва. Гэтыя тэмы Прэзідэнт Беларусі абмяркоўваў з кіраўніком кітайскага дыппрадстаўніцтва ў нашай краіне.
Паводле слоў Аляксандра Лукашэнкі, Цуй Цімін - самы дасведчаны спецыяліст Кітая ў пытаннях двухбаковага парадку, і яго пазіцыя вельмі важная для рэальнага напаўнення адносін і падрыхтоўкі сустрэч на вышэйшым і высокім узроўні.
У пачатку чэрвеня ў кітайскім Ціндаа адбудзецца сустрэча лідараў дзяржаў Шанхайскай арганізацыі супрацоўніцтва. Наша краіна менавіта пры актыўнай падтрымцы кітайскіх партнёраў павысіла свой удзел у гэтай аўтарытэтнай інтэграцыйнай платформе з "партнёра па дыялогу" да "назіральніка".
Да саміту ў Ціндаа пройдзе яшчэ адна знакавая падзея - у Мінск прыбудзе намеснік Старшыні КНР Ван Цішань. І варта адзначыць, што выбар Беларусі ў якасці краіны першага афіцыйнага візіту адразу пасля абрання на высокую пасаду - гэта сведчанне ўвагі кітайскага кіраўніцтва да развіцця і паглыблення двухбаковых адносін.
Кітай і Беларусь звязваюць даўнія і цесныя адносіны. А з 2016 года яны набылі адмысловы статус - давернага ўсебаковага стратэгічнага партнёрства. У лічбах гэта выглядае так. 10 візітаў Прэзідэнта нашай краіны ў Паднябесную. Тавараабарот - больш як 3 мільярды долараў, прычым за ўвесь час дыпадносін ён вырас у 100 разоў! Толькі летась Кітай уклаў у эканоміку Беларусі каля 300 мільёнаў долараў. Адкрылі вытворчасць аўтамабіляў "джылі", будуюць індустрыяльны парк "Вялікі камень". Акрамя таго, Кітай разглядае Беларусь як ключавы транзітны хаб на маршруце новага Шаўковага шляху.
