Сацыяльныя, у прыватнасці - медыцынскія, пытанні абмяркоўвалі на тыдні і на самым высокім узроўні. Да канца года ўсе праблемныя моманты ў ахове здароўя павінны быць вырашаныя. Такое рэзюмэ гутаркі, якая адбылася ў Прэзідэнта.
З мінулага года Кіраўніку дзяржавы стала паступаць інфармацыя аб тым, што колькасць спраў карупцыйнага характару ў гэтай сферы рэзка ўзрасла - амаль удвая. На жаль, такія факты не чужыя любой галіне, але ў ахове здароўя праблема стала скразной, закрануўшы ледзь ці не ўсю вертыкаль: ад прыватнікаў, вайскоўцаў, дзяржслужачых да Міністэрства аховы здароўя. Прэзідэнтам была пастаўленая задача не знайсці "стрэлачнікаў", а дакапацца да галоўных арганізатараў шэрых схем, устанавіць прычыны такога становішча спраў.
Карупцыйны нарыў выявіў Камітэт дзяржбяспекі. Падрабязнасці (персоны і сумы хабараў) узбурылі ўсё грамадства. Пры ўсёй маштабнасці расследавання - у вытворчасці 95 крымінальных спраў, сотня чалавек пад следствам - праца прадпрыемстваў, важных для аховы здароўя, не была паралізаваная.
У чым корань праблем, і чаму такія карупцыйныя праявы наогул сталі магчымымі? Жорсткія пытанні Аляксандр Лукашэнка адрасаваў кіраўніцтву Міністэрства аховы здароўя. Бо такое становішча спраў не толькі ўдар па рэпутацыі міністэрства, але і па кішэні пацыента.
Здаецца, што поспехі айчыннай медыцыны ўсыпілі кіраўнічую пільнасць. Дзейснымі лекамі ад карупцыі можа стаць поўная празрыстасць закупаў, аўкцыёнаў і тэндараў. Усе намаганні - на ўдасканаленне заканадаўства, падбор "пула" незалежных тэхнічных экспертаў, перафарматаванне працы закупных камісій.
Але што яшчэ важна - за па-сапраўднаму "касмічнымі тэхналогіямі", якія ёсць на ўзбраенні айчынных урачоў, важна бачыць тое самае першаснае звяно. Праца паліклінік выклікае нямала нараканняў пацыентаў. Амаль палова скаргаў грамадзян, якія паступаюць у Адміністрацыю Прэзідэнта, гэта арганізацыйныя пытанні. Ад банальных чэргаў да немагчымасці аператыўна атрымаць кансультацыю вузкіх спецыялістаў.
Пачатак 2019 года стане для цяперашняй каманды Міністэрства аховы здароўя момантам ісціны. Прэзідэнт анансаваў вялікую гутарку на тэму аховы здароўя, дзе комплексна паглядзяць на развіццё гэтай сферы.
