Тэму Вялікага Кастрычніка прадоўжым размовай аб адносінах з Амерыкай. Але ў рэчышчы на здзіўленне дружалюбнай рыторыкі нашых заакіянскіх партнёраў. Геапалітычнае становішча і супрацоўніцтва па лініі Мінск - Вашынгтон сталі галоўнымі тэмамі размовы Прэзідэнта з аўтарытэтнымі амерыканскімі экспертамі.
Сярод гасцей Палаца Незалежнасці - прадстаўнікі Джэймстаўнскага фонду і Цэнтра дыпламатыі і глабальных адносін. Гэтыя арганізацыі прадстаўляюць грамадству Злучаных Штатаў погляд на тэндэнцыі, якія ёсць на Еўразійскім кантыненце. Акцэнт - на аналіз пытанняў бяспекі. Рэгулярна публікуюць матэрыялы і аб Беларусі. Таму так важна дакладна з першых вуснаў пачуць ключавыя моманты па найскладанейшых пытаннях эканомікі і бяспекі.
Наша краіна, паводле меркавання экспертаў, адыгрывае ключавую ролю ў паніжэнні напружанасці ў рэгіёне. Аляксандр Лукашэнка так і заявіў, знаходзячыся паміж двума найбуйнейшымі цэнтрамі сілы, Беларусь прадпрымае намаганні, каб стабілізаваць рэгіянальнае становішча, а не "раскалыхваць" яго. Бо і наш спакой напрамую залежыць ад сітуацыі вакол.
Пры гэтым суседзям не варта турбавацца і чакаць пагрозы з боку беларусаў. "Нападаць не збіраемся, але заўсёды зможам сябе абараніць!" - у гэтай простай фразе ўся сутнасць нацыянальнай абароннай палітыкі. Так, сітуацыя ў рэгіёне трымае ў тонусе, але неабходнасці размяшчаць ваенныя базы іншых дзяржаў на нашай зямлі ўжо сапраўды няма.
Прыйшоў час і больш актыўна развіваць дыялог па лініі Мінск - Вашынгтон, добра што ў апошні час азначыўся прагрэс у двухбаковых адносінах. Гэта адзначаюць і па той бок акіяна. Амерыканскія аналітыкі пацвярджаюць, што ўзровень даверу паміж дзяржавамі прыкметна расце.
Сустрэча важная не толькі для беларуска-амерыканскіх адносін, але і для ўсяго рэгіёна. Сітуацыя ва Усходняй Еўропе застаецца вельмі няпростай. Пакуль палітыкі не могуць дамовіцца, ва Украіне працягваюць гінуць людзі. І дыялог па пытаннях бяспекі на мінскай пляцоўцы апошні час ідзе ў рэжыме нон-стоп.
