У пятніцу на ўзроўні Кіраўніка дзяржавы падрабязна абмяркоўвалі энергетыку і структуру Мінэнерга. Урад падрыхтаваў план мадэрнізацыі, але Прэзідэнта ён задаволіў не поўнасцю. Па-першае, пралічана не ўсё - зараз разам з Саўмінам плюсы і мінусы або "нуль і фазу" праекта пралічаць яшчэ і незалежныя эксперты. Па-другое, і гэта галоўнае, стратэгія не ўвязана з найбуйнейшай энергабудоўляй сучаснасці - атамнай станцыяй.
Дагэтуль не ведаем у дэталях, куды пойдзе лішак электраэнергіі. Урад кансерватыўны: электрапліты ў новабудоўлях, начныя тарыфы для ашчадных хатніх гаспадынь, вывад зношаных падстанцый на заводах з падключэннем іх да электрасістэмы. Гэтага мала, упэўнены Аляксандр Лукашэнка. Патрэбная свая праграма электрамабіляў, свае новыя энергаёмістыя аб'екты - ад рабатызаваных агракомплексаў да прамысловых 3D-прынтараў.
Плюс цяжкая індустрыя, перапрацоўка, ЖКГ і IT - усюды, дзе трэба шмат электраэнергіі. Прынцып адзін - справядлівыя тарыфы і суцэльная мадэрнізацыя, каб потым не бегаць і не выпраўляць непрадбачаныя шурпатасці. Тым больш наш і сусветны вопыт ёсць - усе хады знаёмыя.
На дапрацоўку праекта мадэрнізацыі энергасістэмы Прэзідэнт адвёў спецыялістам усяго месяц. У пачатку будучага года спытаюць з урада і па маштабным плане электрыфікацыі ўсёй краіны. І гэта пытанне не толькі эканомікі. Выхад на стапрацэнтную энергетычную незалежнасць і бяспека - асноўны прыярытэт і мэта, заяўленая ў гэтым сектары.
Мэта дасягальная. Бо адмовіліся ж сёлета ўпершыню ў сваёй суверэннай гісторыі ад імпарту электраэнергіі. Ды і па выніках пяці гадоў нават на фоне сур'ёзнай мадэрнізацыі прамысловасці, АПК і сацыяльнай сферы захавалі тарыфы. Яны адны з самых камфортных у Еўразіі. Саступаем, напрыклад, Расіі. Але, па-першае, у нас няма такой нафтагазавай скарбонкі, атамнага сектара і савецкіх яшчэ энергетычных гігантаў. А, па-другое, адзін з прыярытэтаў Еўразійскага саюза - выхад на агульны энергарынак ЕАЭС, калі ўнутраныя тарыфы павінны зраўнавацца.
