17 дзён напружанай барацьбы, шэсць заваяваных медалёў і трыумфальнае вяртанне на радзіму. У Сочы напярэдадні адзначалі год з моманту пачатку 22 зімовых Алімпійскіх гульняў. Для Беларусі гэта падзея таксама знакавая, бо тая Алімпіяда стала для нас самай паспяховай у гісторыі. Бронза Надзеі Скардзіна, залатыя скачкі Антона Кушніра і Алы Цупер і, вядома ж, фенаменальны хет-трык Дар'і Домрачавай. Праз год беларуская ракета нават не думае спыняцца і прадаўжае ставіць рэкорды. Уся краіна захоплена назірае за тым, як наша Даша б'ецца за Вялікі крыштальны глобус з фінкай Кайсай Мякярайнен. Чарговы этап Кубка свету праходзіў у чэшскім горадзе Нове-Места.
Рэпартаж Паўла Капуцкага.
Для большасці беларусаў біятлон пачынаецца за пяць хвілін да старту гонкі, гэта значыць, разам з тэлетрансляцыяй. Але ёсць і меншасць. Гэтыя людзі ехалі ў Чэхію з Мінска амаль суткі. Каб потым з гасцініцы кожны дзень дабірацца да стадыёна і назад, недасыпаць, гадзінамі знаходзіцца на марозе.
Менавіта яны потым размахваюць беларускімі флагамі на трыбунах, а калі трэба, гатовыя на фінішы аддаць гэты балельшчыцкі атрыбут Домрачавай, якая здабывае чарговую перамогу. Праўда, потым Дар'я вяртае флаг, які для фанатаў пасля гэтага становіцца шчаслівым.
За Домрачаву хварэюць не толькі ў Беларусі і не толькі беларусы. У Германіі, напрыклад, ёсць неафіцыйны фан-клуб нашай Дар'і. Каля 30 чалавек. Нямецкія блізнюкі Герфрыд і Герхард у яго не ўваходзяць, пры гэтым сімпатызуюць беларусцы.
Герфрыд і Герхард Кюнэ, нямецкія балельшчыкі: "У Германіі, вядома ж, ведаюць Дашу. І немцы таксама за яе хварэюць. У Домрачавай вельмі прыемная і вельмі моцная аўра, таму яна падабаецца фанатам біятлона. Хоць, калі сапраўды, трошкі крыўдна, што немкі ўвесь час аказваюцца за Домрачавай".
Здаецца, гэта было толькі што. З моманту першага залатога медаля Дар'і Домрачавой на гульнях у Сочы прайшоў амаль год. Пасля выдатнай гонкі праследавання былі фантастычная індывідуалка і фенаменальны мас-старт. Яна зрабіла тое, што немагчыма паўтарыць.
Аляксандр Каспяровіч, старшы трэнер мужчынскай зборнай Расіі па біятлоне: "Яна гатовая была. Усё-такі тры залатыя медалі заваяваць на Алімпійскіх гульнях - гэта не так проста. Яна вялікі спартсмен. Вельмі вялікі спартсмен. Яна прадаўжае працаваць. Мы бачым яе, мы назіраем за ёй. Трэба ганарыцца такой спартсменкай".
Двухразовая чэмпіёнка Еўропы, двухразовая чэмпіёнка свету, уладальніца чатырох малых крыштальных глобусаў, бронзавы прызёр Алімпіяды ў Ванкуверы. Трохразовая чэмпіёнка Гульняў у Сочы. Адна з самых тытулаваных біятланістак свету пакуль не можа сказаць: "Я выйграла ўсё!" Па сутнасці ў Домрачавай у спорце засталася адна непакорная вяршыня: Вялікі крыштальны глобус.
Адзіная, хто можа перашкодзіць беларусцы заняць першае месца ў агульным заліку гэтага сезона - Кайса Мякарайнен. Менавіта таму ў нашай краіне вельмі многія ведаюць імя гэтай фінкі. У адрозненне ад Домрачавай, яна не перамагала на Алімпіядзе. Затое двойчы брала запаветны Глобус.
Кайса Мякарайнен, двухразовая пераможца Кубка свету па біятлоне: "Я магу сказаць, што мы з Дар'яй сяброўкі, але за межамі біятлоннага стадыёна мы насамрэч амаль не маем зносін. Дарэчы, яна добра гаворыць па-англійскі. Ну і, вядома ж, Домрачава цудоўная спартсменка".
Нават галоўная саперніца на лыжні заве яе сяброўкай. . Англічанін з украінскім каранямі Люк Тчаленка працуе ў Міжнародным саюзе біятланістаў. І гэта праца дазваляе яму рэгулярна бачыць зорную беларуску.
Люк Тчаленка, прадзюсар Міжнароднага саюза біятланістаў: "Усім вельмі падабаецца ваш беларускі герой Дар'я Домрачава. Вельмі класная атлетка. Яна вельмі добрая, адкрытая дзяўчына. Так-так-так. Усе, прэса, журналісты. Усім яна вельмі падабаецца".
Напярэдадні пасля чацвёртага месца ў спрынце Домрачава чарговы раз аддала сябе ў распараджэнне журналістаў. Гэта частка яе працы, а працаваць наша спартсменка прывыкла якасна. У агульным заліку Кубка свету Мякарайнен пакуль яшчэ лідзіруе, але ўжо адчувае гарачае дыханне беларускі.
Дар'я Домрачава, трохразовая алімпійская чэмпіёнка: "Выходзім на гонку, змагаемся. Самае галоўнае - гэта спорт. Барацьба з самім сабой. Ты тут знаходзішся як спартсмен, які спрабуе пераадолець сябе. Пераадолеўшы сябе, ты пераадолееш другіх".
Да завяршэння Кубка свету застаюцца яшчэ два этапы. І чэмпіянат свету. Ужо на наступным тыдні біятланісты і біятланісткі будуць ваяваць за медалі ў нарвежскім Халменколене. У чэшскі гарадок Нове-Места вялікі спорт вернецца толькі праз год.
Заўважыўшы людзей з беларускай сімволікай, іншаземцы звычайна рэагуюць так: "О, Дар'я Домрачава!". Гэта ўжо не проста імя - нацыянальны брэнд.
