Адпаведны ўказ падпісаў Кіраўнік дзяржавы. Знізіць колькасць аварый і колькасць загінуўшых на дарозе паспрабуюць у наступным годзе інспектары ДАІ. Абавязковы пераход на зімовую гуму павінен паменшыць колькасць заносаў, а пастаяннае выкарыстанне дзіцячага крэсла - прадухіліць траўміраванне самых маленькіх пасажыраў.
І на гэтым моманце мы спынімся больш падрабязна. Ва ўказе сказана: "Дзяцей ва ўзросце да 12 гадоў у легкавым аўтамабілі абавязаныя перавозіць з выкарыстаннем дзіцячых прыстасаванняў, якія ўтрымліваюць, або іншых сродкаў, што дазваляюць бяспечна прышпіліць дзіця".
Вось не зусім стандартнае дзіцячае крэсла. Хутчэй, яно падпадае пад агульнае азначэнне "прыстасаванне, якое ўтрымлівае". Ці здольнае яно хоць гарантаваць бяспеку дзіцяці, - гэта вялікае пытанне.
Наш карэспандэнт Уладзімір Каралёў дбайна вывучыў усе новаўвядзенні ў ПДР.
Сёння ў Беларусі зарэгістравана амаль 4 мільёны аўтамабіляў. Кожны пяты транспартны сродак ездзіць з мінскімі нумарамі. У рэйтынгу аўтамабілізацыі на душу насельніцтва, Беларусь - лідар сярод краін СНД. Па суседстве з намі Венгрыя, Латвія і Літва. Магчыма, таму з гадамі правілы дарожнага руху ўсё больш становяцца падобнымі на агульнаеўрапейскія.
Абавязковы пераход на зімовую гуму ўведзены ў Аўстрыі, Чэхіі, Славакіі, Эстоніі, Люксембургу, Фінляндыі, Румыніі і нават Германіі. Як лічаць у ДАІ, для Беларусі дрэннае надвор'е - не паўгода, а ўсяго толькі з 1 снежня па 1 сакавіка. А значыць, на тры месяцы надыдзе сезон пакрышак са значком сняжынкі.
І ўсё ж спецыялісты не рэкамендуюць выкарыстоўваць усесезонкі - іх рабочая тэмпература каля нуля. Летам такі абутак хутка зношваецца, а пры моцным мінусе менш эластычны. Таму спецыялісты на гуме скупіцца не раяць, тым больш, што павышэнне цаны ніхто не прагназуе - мінулай зімой каўчукавыя дылеры засталіся ў мінусе.
Анатоль Шаўчэнка, арганізатар аўтамабільных гонак, рэдактар аўтамабільнага выдання: "Шыны з мінулай зімы ляжаць да гэтага часу. У сувязі з гэтым я не думаю, што яны будуць цэннік моцна павышаць, з-за таго, каб прадаць старое. Ім трэба плаціць працэнты па крэдытах. Я думаю, што гэта ці наўрад прывядзе да істотнага павышэння цэн".
Што рабіць, калі аўто выйшла пасля рамонту, напрыклад у лютым, але яшчэ не пераабулася, пакуль невядома. Афіцыйна закон яшчэ не апублікаваны. Затое не сакрэт, што перавозіць на такім аўтамабілі дзяцей ужо будзе нельга - у салоне абавязкова трэба ўстанавіць дзіцячае крэсла. Чым сканчаюцца аварыі з не прышпіленым дзіцём на заднім сядзенні, вядома. Уласнае сядзенне для малога ў машыне - агульнапрынятая норма ў многіх краінах.
Крытэрыі да дзіцячых сядзенняў будуць таксама прапісаныя. Бяспечнае крэсла не можа каштаваць 15 долараў, як гэта. Таму жадаем загадзя перасцерагчы, купляючы проста вось такую накідку ў выглядзе дзіцячага сядзення, вы не пазбегнеце ні штрафаў, ні траўм у выпадку здарэння.
Дзіця да 12 гадоў або ростам да 150 сантыметраў павінна падарожнічаць толькі ў дзіцячым сядзенні. Выключэнне можа скласці толькі таксі. Але магчыма, што і гэты нюанс у будучыні знікне. Еўрапейскія аўтаперавозчыкі пры дастаўцы пасажыра з дзіцём падаюць аўтамабілі з дзіцячым крэслам.
Станіслаў Салавей, старшы інспектар па асобых даручэннях УДАІ МУС Беларусі: "Дзіцячыя прыстасаванні, якія ўтрымліваюць, павінны фіксавацца ў адпаведнасці з патрабаваннямі інструкцыі. Гэта неабходна рабіць правільна, для таго, каб надзейна замацаваць крэсла".
Паводле новых правіл, вучыць дарожнай Бібліі ў аўташколах Беларусі будуць 4 месяцы, а колькасць кіравання павялічыцца на 10 гадзін. Заканадаўцы ўпэўненыя - з такімі зменамі ў аўташколы пойдуць тыя, хто сапраўды жадае навучыцца ездзіць.
Уладзімір Свірыдовіч, намеснік начальніка міжраённага экзаменацыйнага аддзела ДАІ Мінска: "З 10 ён адказаў на 3 пытанні, і адзін з іх толькі правільны. Адразу ж атрымаў нездавальняючы вынік".
Два няправільныя адказы з трох першых пытанняў - для некаторых гэта ўжо норма, гавораць у ДАІ. Кожны пяты права на правы страчвае пры першым жа выпрабаванні - тэорыі. Але самае складанае - гэта праверка горадам. З пачатку гэтага года больш як 70% усіх курсантаў завалілі экзамен хоць бы раз. Інспектары ўпэўніваюць, каб падняць паказчык, трэба ўзмацніць кантроль за аўташколамі.
Уладзімір Свірыдовіч, намеснік начальніка міжраённага экзаменацыйнага аддзела ДАІ Мінска: "Няма належнага кантролю за выкананнем тых жа праграм і за працай выкладчыкаў і інструктараў. Дакументальна ўсё добра, а насамрэч далёка не так. Пачынаеш гутарыць з тымі, хто прыйшоў здаваць, і ўжо па 5-10 раз ходзяць, тады яны адкываюцца. Таму што з 40 гадзін у лепшым выпадку палову ад'ездзілі".
Аўташколы ў сваю чаргу грашаць на вучняў. Бо раней на правы здавалі тыя, хто хацеў вучыцца, а зараз усе запар. З новага года будучых вадзіцеляў чакае павелічэнне цаны на права сесці за руль.
Дзякуючы новым правілам, шкло ў машынах пацямнее. Мінімальную ступень святлопранікальнасці для лабавага шкла дазволяць да 70%. Так у інспектараў на трасе і падчас тэхагляду стане менш заўваг. Акрамя таго, на дарогах з'явіцца зялёная разметка для веласіпедыстаў. Новы ўказ уступіць у сілу праз тры месяцы пасля яго публікацыі. А паколькі дакумент яшчэ не апублікаваны, то можна сказаць, што правілы пачнуць дзейнічаць не раней, чым з сярэдзіны студзеня.
