Атрымаць такі матэрыял з Амерыкі на працягу некалькіх секунд можна дзякуючы, у тым ліку, і развіццю спадарожнікавых тэхналогій. Пра іх на тыдні гаварылі і ў Беларусі на вышэйшым узроўні. Наша краіна пачынае новы этап у развіцці сістэмы сувязі. Размова ідзе пра маштабны сумесны праект з кітайскай карпарацыяй - пра Нацыянальную сістэму спадарожнікавай сувязі і вяшчання. У Дзень касманаўтыкі Аляксандр Лукашэнка наведаў наземны комплекс кіравання пад Дзяржынскам. Адсюль кіруюць працай спадарожніка сувязі "Белінтэрсат-1". Ён быў запушчаны на арбіту ў студзені.
Нягледзячы на меркаванні скептыкаў, у свой час у краіне было прынята прынцыповае рашэнне аб развіцці касмічных тэхналогій. Як вынік, паспяхова працуе першы беларускі спадарожнік штучнага зандзіравання Зямлі. І вось наступны крок на шляху інтэграцыі ў сусветную інфармацыйную прастору. З запускам "Белінтэрсата" адкрываюцца магчымасці рэалізацыі тэлекамунікацыйных паслуг у краіне і за мяжой. Падчас зносін з супрацоўнікамі наземнага комплексу кіравання была закранута тэма бяспекі краіны.
Калектыў комплексу - у асноўным моладзь, таму размова зайшла і аб праблеме працаўладкавання выпускнікоў. Гаварыў Прэзідэнт і аб развіцці высокатэхналагічных сфер, такіх як атамная энергетыка і IT. Што тычыцца касмічнай галіны, гэта справа прэстыжу плюс прывабныя эканамічныя перспектывы. Такія праекты даюць імпульс развіццю цэлых галін, а краіна трапляе ў поле цікавасці замежных інвестараў.
