Да выбараў у парламент зараз рыхтуюцца і ў Грузіі. Новы дэпутацкі корпус у краіне хінкалі і хачапуры будзе сфарміраваны ў пачатку кастрычніка. Маштабная нацыянальная выстава Беларусі, якая на тыдні адкрылася ў Тбілісі, змагла часткова адцягнуць увагу грузін ад палітыкі. У фокусе аказаліся прамысловая кааперацыя, стварэнне сумесных прадпрыемстваў і пастаўкі прадуктаў з Беларусі на рынак Сакартвела.
Імпульс двухбаковаму супрацоўніцтву павінна надаць пасольства Беларусі, якое адкрылася ў Тбілісі з новым кіраўніком дыпмісіі. Якім чынам Беларусь і Грузія плануюць накіраваць тавараабарот рэзка "ў горы" - распавядзе Аляксей Адашкін.
Верасень у Грузіі ў прамым і пераносным сэнсе выдаўся спякотным. На тэрмометры плюс 30. Горача і на палітычнай кухні. Таксама як і ў Беларусі, тут зараз у актыўнай фазе падрыхтоўка да выбараў у парламент. 45 партый спрабуюць заваяваць сімпатыі выбаршчыкаў. Палітычныя погляды ва ўсіх прэтэндэнтаў на пападанне ў заканадаўцы розныя. Але ёсць тое, што аб'ядноўвае як кіруючую партыю, так і шматлікія сілы апазіцыі. І гэта арыентацыя на цеснае супрацоўніцтва і моцнае сяброўства з Беларуссю.
Ніна Бурджанадзэ двойчы станавілася спікерам парламента Грузіі. Два разы за сваю кар'еру яна выконвала і абавязкі кіраўніка дзяржавы. Сёння грузінская "жалезная лэдзі" вядзе на выбары "Аб'яднаны дэмакратычны рух", партыю апазіцыйную.
Кіруючая партыя "Грузінская мара" бачыць у Беларусі партнёра, з дапамогай якога можна падцягнуць эканоміку краіны. Тбілісі ўзяў курс на адраджэнне і мадэрнізацыю сяла. Тэхнічную рэвалюцыю на мясцовым рынку машын для аграрыяў абяцаюць ажыццявіць на гэтым заводзе ў прыгарадзе сталіцы. У жніўні адгэтуль выехалі першыя беларуска-грузінскія трактары.
У мадэльным радзе - чатыры віды машын. Кампактныя, непатрабавальныя, і пры гэтым даступныя па цане. Тэхніка з Беларусі дапамагае ажывіць і сельскую гаспадарку, і прамысловасць у Грузіі.
Першую партыю трактароў толькі сабралі, а прэм'ер-міністр Грузіі ўжо асабіста тэсціруе тэхніку. На чатыры дні ўсе павільёны цэнтра ExpoGeorgia ў Тбілісі занялі беларускія прадпрыемствы. Гэта самы маштабны форум такога фармату, які наша краіна сёлета арганізавала за мяжой.
Ад сала, бульбы, прысмакаў і да лекаў, пасажырскай тэхнікі і распрацовак у сферы IT. Выстава ў Тбілісі з шырокім размахам паказала, якія нішы на грузінскім рынку маглі бы заняць нашы прадпрыемствы і кампаніі.
Сумесны тавараабарот паміж краінамі ўжо сёння б'е рэкорды. За паўгода наш экспарт у Грузію вырас у тры разы. Адначасова з выставай у Тбілісі прайшоў і бізнес-форум. У дзелавым кангрэсе прынялі ўдзел прадстаўнікі трох сотняў кампаній.
Цікавасць краін адна да адной істотна падагрэлі кантакты на вышэйшым узроўні. Летась Прэзідэнт Аляксандр Лукашэнка ўпершыню наведаў Грузію.
Ужо ў пачатку 2016 прэм'ер-міністр Георгій Квірыкашвілі пабываў у Мінску.
Бізнесмен Акакі Татышвілі зацікавіўся прадукцыяй з нашай краіны як раз пасля серыі сустрэч у вярхах. Летась прадпрымальнік пачаткаў закупляць беларускія шыны. І за кароткі час стаў адным з найбуйнейшых імпарцёраў пакрышак у Грузіі.
З 2014 года ў Тбілісі працуе прадстаўніцтва канцэрна "Белнафтахім". Гандлёвы дом прапануе на рынку Грузіі пяць сотняў відаў прадукцыі. Мінеральныя ўгнаенні і шыны, якія пастаўляе сюды гэты філіял, складаюць адны з самых істотных артыкулаў беларускага экспарту ў закаўказскую рэспубліку.
А гэта першы магазін выключна беларускіх прадуктаў, які расчыніў свае дзверы літаральна днямі ў адным з мікрараёнаў Тбілісі.
Правіянт з Беларусі даязджае да прылаўка менш чым за тыдзень. У планах бізнесменаў - стварэнне цэлай гандлёвай сеткі з беларускімі ласункамі.
Гасціннасць - гэта той грузінскі тавар, які асабліва прываблівае беларусаў. Сёлета на 60 % вырасла колькасць нашых суайчыннікаў, якія пабывалі на радзіме Пірасмані. Вядуцца перамовы, каб пабудаваць у Грузіі гатэлі з беларускім капіталам.
Але не толькі таварныя і турыстычныя патокі аб'ядноўваюць дзве краіны.
Тарыела Майсурадзэ называюць грузінскім беларусам. У Мінску ён жыве з 1988 года. Менавіта ў Беларусі стаў папулярным спеваком. Але сувязі з радзімай не страчвае. Хоча арганізаваць у Тбілісі маштабны канцэрт беларускіх артыстаў, каб культура не адставала ад эканомікі.
Зблізіць краіны дапаможа і беларускае пасольства, якое на мінулым тыдні адкрылася ў Тбілісі. Дыпламатычнае прадстаўніцтва стане той пляцоўкай, якая дазволіць айчынным прадпрыемствам і кампаніям надзейна замацавацца на рынку Сакартвела.
