Моцны Еўрапейскі саюз, што выступае з прагматычных пазіцый у дачыненні да суседзяў. Прэзідэнт Беларусі на тыдні прапанаваў сваё бачанне нашага буйнога гандлёва-эканамічнага і палітычнага партнёра і перасцярог ад залішняй палітызацыі такіх рабочых інструментаў ЕС, як "Усходняе партнёрства". Гэта адбылося на сустрэчы з Камісарам ЕС па еўрапейскай палітыцы суседства Іаханесам Ханам.
Рацыянальны падыход афіцыйнага Мінска ў тым, што без моцнага Еўрасаюза шматпалярны свет страчвае адну са сваіх ключавых апор, а Беларусь - партнёра па бяспецы і ўстойлівым развіцці ў Еўропе. Ужо сёння па экспарце ЕС дагнаў Расію ў нашым тавараабароце, пры гэтым прырост склаў траціну да мінулага года. Такімі тэмпамі ён не расце ні на адным супастаўным па маштабе рынку.
За апошнія гады Беларусі і ЕС удалося нармалізаваць адносіны. Знята большасць санкцый, еўрабанкі, у тым ліку інвестыцыйны і рэканструкцыі і развіцця, гатовыя ўкладваць у праекты мадэрнізацыі, у тым ліку дзяржаўныя. Падтрыманыя наша ўступленне ў СГА і развіццё лагістычных калідораў з Азіі ў Еўропу праз Беларусь.
Але гэтым парадак дня не абмяжоўваецца. Наперадзе падпісанне базавага усёабдымнага пагаднення Беларусь - Еўрасаюз, лібералізацыя візавага рэжыму, тут мы ўжо пайшлі насустрач - увялі кароткатэрміновы бязвіз. Плюс стратэгічнае жаданне зблізіць пазіцыі двух саюзаў - Еўразійскага і Еўрапейскага і напоўніць "Усходняе партнёрства" рэальнымі праектамі ў энергетыцы, транспарце, экалогіі і інфраструктуры. Такая прыземленасць і акцэнт на прагматыцы пойдзе "Усходняму партнёрству" на карысць, падкрэсліў Прэзідэнт, прымаючы Еўракамісара.
"Беларусі і Еўрасаюзу як вопытным фінішорам засталося пераадолець зусім кароткую дыстанцыю да заключэння базавага дагавора", - гэта метафара самога Еўракамісара. Пры гэтым Іаханес Хан падзякаваў нашай краіне за цвёрдую і паслядоўную пазіцыю. На фоне перманентнага скепсісу наконт лёсу аб'яднання яна выглядае вельмі годна.
