Пагадненні, заключаныя ў беларускай сталіцы, разбіраюць і аналізуюць вядучыя выданні планеты - брытанскія "Гардыян" і "Індэпендэнт", амерыканская "Нью-Ёрк Таймс", нямецкая "Дойчэ Веле", італьянская "Ла стампа". Газеты і часопісы Еўропы, Азіі, ЗША, Блізкага Усходу. Да новых мінскіх пагадненняў акулы пяра ставяцца з насцярожанасцю, уласцівай прафесіі. Але часцей за ўсё ў загалоўкі артыкулаў, прысвечаных гістарычнай сустрэчы, вынесены словы "Мінск" і "надзея".
Мэры Дэжэўскі - аглядальнік адной з самых папулярных штодзённых газет Туманнага Альбіёна "Індэпендэнт", лічыць, што ад мінскіх пагадненняў залежыць пытанне палітычнага ўрэгулявання сітуацыі ва Украіне.
Журналіст "Бі-бі-сі" Таццяна Мельнічук, яна, дарэчы, задавала пытанне Прэзідэнту на нядаўнім адкрытым дыялогу, упэўнена, што Украіну ў Мінску "ратавалі".
Пра новую надзею на мірнае ўрэгуляванне крызісу на Данбасе з пазнакай "тэрмінова" паведамляе сайт вядучага навінавага тэлеканала Старога Свету "Еўраньюс".
Дарэчы, згодна са статыстыкай пошукавага гіганта Google, за першыя суткі, што прайшлі пасля мінскага саміту, на сайтах навінавых парталаў, агенцтваў, тэлекампаній з'явілася каля пяці тысяч артыкулаў, якія змяшчаюць у загалоўку слова "Minsk". На папулярным відэахостынгу Youtube з'явілася больш за дзве тысячы відэаролікаў. І сустрэча чацвёркі застаецца ў топах навін. Да канца тыдня колькасць артыкулаў, прысвечаных мірным перамовам у беларускай сталіцы, перавысіла 8 тысяч. Колькасць відэазапісаў пераваліла за 14 тысяч.
"Вялізны прарыў", "выдатны вынік", "важная сустрэча". Поспех мінскага саміту прывіталі Генеральны сакратар ААН Пан Гі Мун, Генеральны сакратар АБСЕ Ламберта Заньер, кіраўнікі еўрапейскіх дзяржаў, урадаў, кіраўнікі знешнепалітычных ведамстваў ЕС і ЗША.
Дональд Туск, старшыня Еўрапейскага савета: "Мінскае пагадненне - прыемная навіна, яно дае надзею. Надзея - гэта добра, нават неабходна, але адной надзеі недастаткова. Рэальнае выпрабаванне - гэта выкананне ўмовы аб спыненні агню на месцы".
Джэніфер Псакі, прадстаўнік Дзярждэпартамента ЗША: "Неабходна будзе прарабіць доўгі шлях для дасягнення міру і аднаўлення ўкраінскага суверэнітэту. Але першыя спробы і першыя крокі ў гэтым кірунку ўжо зроблены. Як адзначыў дзяржсакратар ЗША ў спецыяльнай заяве, мы гатовы прапанаваць сваю дапамогу і свае паслугі для таго, каб падтрымаць намаганні".
Франк-Вальтэр Штайнмаер, міністр замежных спраў Германіі: "Гэта была вельмі доўгая ноч у Мінску. Гэта былі вельмі складаныя перамовы. Кожны ведаў, што пастаўлена на кон. Кожнаму былі зразумелы наступствы завяршэння перамоў без выніку. Было, нарэшце, агульнае перакананне ў тым, што гэтага не павінна адбыцца. Я вітаю той факт, што ўдалося ўзгадніць агульны дакумент".
