Чэмпіёнамі нараджаюцца або ўсё-такі становяцца? Пытанне з разраду экзістэнцыйных. Тут можна шмат спрачацца, прыводзячы прыклады з гісторыі, калі перамогі прыходзілі не дзякуючы, а насуперак. Але ёсць факт: у кожнага чэмпіёна быў (або ёсць) чалавек, які спачатку паверыў, потым навучыў і падтрымаў у цяжкую хвіліну. Гэта трэнер. У самым шырокім сэнсе - настаўнік. І, трэба сказаць, вось гэты "фактар настаўніка" актуальны для ўсіх - не толькі для чэмпіёнаў.
Роля, месца і статус настаўніка ў грамадстве як раз на гэтым тыдні абмяркоўвалі ў Мінску на высокім узроўні. Абмяркоўвалі прадметна, дакранаючыся самых нязручных пытанняў з гэтай галіны: як павысіць статус настаўнікаў і як палепшыць матэрыяльнае заахвочванне тых, каму грамадства даручыла самае каштоўнае.
Прэзідэнт падкрэсліў, што арганізацыйная частка ў адукацыі - правілы прыёму ў ВНУ, агульная структура ўстаноў у рэформах не мае патрэбы. А методыка выкладання - насупраць. У партфелях школьнікаў у гэтым навучальным сезоне з'явяцца 28 новых падручнікаў. На старонках менш тэксту, больш карт, графікаў і дыяграм. Галоўная задача аўтараў - навучыць аналізаваць і разважаць.
