Дзяржава з насельніцтвам 500 тысяч чалавек зрабіла сабе рэнамэ як сусветны фінансавы і інвестыцыйны цэнтр. Паводле некаторых ацэнак, сукупны капітал люксембургскай фінансавай сістэмы амаль 750 мільярдаў еўра.
Гэта пляцоўка прымала Беларуска-еўрапейскі эканамічны форум. Нашы дзелавыя колы вязуць важкі пакет дакументаў. У паўмільярда долараў ацэньваюць праект 21 рэзідэнта парка "Вялікі камень". Да 2020 года нямецкая кампанія "Ланц Мануфактур" запусціць у нас вытворчасць святлодыёдных лямп і свяцільняў LED. Гэтыя самыя лямпы ўжо гатовыя выкарыстаць на мінскіх аб'ектах да Еўрапейскіх гульняў. Індустрыяльны парк падпісаў і два пагадненні аб намерах.
Светлагорскі цэлюлозна-кардонны камбінат вязе дагавор з эксклюзіўным трэйдарам. У партфелі СЭЗ "Гродна-інвест" - пратакол аб намерах і мемарандум аб супрацоўніцтве ў сферах інвестыцый, прамысловасці і IT. Еўрапейскі банк рэканструкцыі і развіцця гатовы ўдзельнічаць у рэканструкцыі дарогі Р80 Слабада - Паперня. Праект мадэрнізацыі сістэмы ацяплення жылых будынкаў у Беларусі атрымаў падтрымку буйнога кансорцыума. Гэта дазволіць у будучыні знізіць спажыванне энергіі і тарыфы. Еўрапейскі інвестыцыйны банк гатовы працаваць з намі па цэлым шэрагу кірункаў.
Важны сігнал прагучаў і ў беларуска-еўрапейскім дыялогу. Размова аб падрыхтоўцы поўнамаштабнага пагаднення ЕС - Беларусь зайшла на сустрэчы нашага прэм'ер-міністра Андрэя Кабякова і еўракамісара Іаханеса Хана. А з калегам - прэм'ер-міністрам Люксембурга - дамовіліся аб прапрацоўцы пагаднення аб пазбяганні падвойнага падаткаабкладання.
