Пра сапраўднае багацце беларускіх палёў - паўночны шоўк або проста лён - на тыдні таксама ўспаміналі. І далёка не ў самым пазітыўным ключы.
Віцебскі рэгіён па праве можна лічыць ільняным - там працуе 9 ільнозаводаў, 12 ільнасеяльных гаспадарак і адзіны ў краіне Інстытут ільну.
Старшыня Камітэта дзяржкантролю Леанід Анфімаў падчас наведвання Віцебскага рэгіёна праверыў працу мадэрнізаванага Аршанскага льнокамбіната. Галоўная выснова рабочай паездкі - трэба вырошчваць сваё доўгае валакно. Толькі з яго можна зрабіць запатрабаваны на жорсткім канкурэнтным рынку тавар. Абноўлены камбінат гатовы працаваць з доўгім валакном - толькі яго нашы заводы пакуль не могуць пастаўляць у вялікіх аб'ёмах. Вось такі замкнёны льняны круг.
Тым не менш менавіта наша валакно высока шануюць. Асабліва замежныя партнёры. Лён новага ўраджаю актыўна купляюць вытворцы-прамыслоўцы з Кітая, Польшчы і нават Бельгіі і Германіі - а гэта краіны, у якіх ёсць і свае палі льну. Паміж іншым, па вытворчасці льновалакна ў Еўропе мы выйшлі на ўпэўненае трэцяе месца пасля Францыі і Нідэрландаў.
