Самы ўзрыванебяспечны горад Еўропы. Кіеў на тыдні узрушыў чарговы гучны замах. У сераду ў студыі тэлеканала "Эспрэса" прагрымеў магутны выбух. Бомба была закладзеная ў прыпаркаваным ля ўваходу ў будынак скутары. Загінулі два чалавекі - выпадковы прахожы і целаахоўнік дэпутата "Радыкальнай партыі" Ігара Масійчука. Сам нардэп атрымаў раненні і быў праапераваны. Яго жыццю нічога не пагражае. Партыйнае кіраўніцтва заявіла, што замах звязаны з палітычнай дзейнасцю дэпутата.
Ігар Масійчук - перакананы нацыяналіст. Раней быў намеснікам камандзіра батальёна "Азоў". Перад Майданам сядзеў за спробу арганізацыі тэракта, пасля быў амністыраваны і рэабілітаваны. У 2015-м Масійчука затрымалі ў будынку Вярхоўнай рады - Генпракуратура апублікавала відэа, на якім нардэп абяцае невядомаму суразмоўцу дэпутацкі "дах" і бярэ ў яго грошы. Таму ўкраінскія эксперты схільныя лічыць, што замах на Масійчука носіць не палітычны, а, хутчэй, крымінальны характар.
Гавораць і аб рознагалоссях унутры нацыяналістычных сіл. Напярэдадні замаху Ігар Масійчук удзельнічаў у сутычках у Святошынскім судзе Кіева. Паводле звестак мясцовых СМІ, пасварыліся з-за правоў на жылы дом на ўскраіне ўкраінскай сталіцы.
Як бы тое ні было, замах на Масійчука далёка не першае падобнае здарэнне за апошні час. У верасні ў цэнтры Кіева ў сваім аўтамабілі падарвалі грамадзяніна Грузіі, выхадца з Чачні - Цімура Махауры. У сакавіку зноў жа ў цэнтры горада застрэлілі экс-дэпутата КПРФ Дзяніса Вараненкава. Летам мінулага года ахвярай закладзенай у машыне бомбы стаў журналіст Павел Шарамет. Ніводнае з забойстваў пакуль не раскрытае.
І сапраўдным шокам сталі для грамадзян краіны дадзеныя, агучаныя галоўным ваенным пракурорам. Як паведаміў Анатоль Матыяс, з пачатку канфлікту ў Данбасе 10 тысяч вайскоўцаў былі забітыя альбо параненыя з-за халатнасці, альбо невыконвання воінскіх статутаў. Гэта значыць - усе гэтыя людзі аднесеныя да так званых небаявых страт. Яшчэ 360 тысяч ветэранаў баявых дзеянняў - адзначыў пракурор - пакутуюць ад посттраўматычнага сіндрому і не атрымліваюць дапамогі.
На фоне крызісу бяспекі ўжо гучаць прапановы ўвесці ў сталіцы асаблівы рэжым. Так улады могуць вырашыць адразу дзве праблемы. Уласна, з бяспекай і з бесперапыннымі ўжо два тыдні акцыямі ля сценаў Вярхоўнай рады. З 17 кастрычніка мітынгуючыя пад кіраўніцтвам экскіраўніка Адэскай вобласці Міхаіла Саакашвілі дабіваюцца адмены дэпутацкай недатыкальнасці, стварэння антыкарупцыйнага суда і адстаўкі прэзідэнта Парашэнкі.
Зрэшты, так званы Міхамайдан да Еўрамайдана па размаху відавочна не дацягвае. Мабыць, без пячэнькаў - а іх у лагеры Саакашвілі пакуль не раздавалі - рэвалюцыйная барацьба не ўладкоўваецца. Ды і з забеспячэннем у пратэстантаў відавочныя праблемы. На днях актывісты папрасілі кіяўлян ахвяраваць ім бялізну.
