Вучэнні "Захад-2017" завершацца ўжо ў сераду. Аднак інфармацыйны ажыятаж вакол манеўраў не сціхае. Прадстаўнікі еўрапейскіх дзяржаў працягваюць палохаць насельніцтва сваіх краін выдуманай пагрозай, якая зыходзіць ад беларуска-расійскіх манеўраў. Такія здагадкі яшчэ напрыканцы жніўня каменціраваў начальнік беларускага Генштаба. Генерал-маёр Белаконеў заявіў, што военачальнік, які вырашыцца весці агрэсіўныя дзеянні супраць найбуйнейшага ваеннага блока планеты сіламі, якія будуць задзейнічаны ў "Захадзе-2017", трапіць у Кнігу рэкордаў Гінэса. Праўда, не як вайсковец, а як авантурыст.
Вось так, для параўнання, выглядае сапраўдная дэманстрацыя сілы. Гэта вучэнні "Захад" у 1981-ым годзе - супрацьстаянне СССР і НАТА тады дасягнула піку. У "Захадзе-81" прынялі ўдзел больш за сто тысяч чалавек і ўсе роды войскаў - ад пяхоты да авіяцыі і флоту. Падчас гэтых вучэнняў адпрацоўвалася наступальная аперацыя. Згодна з задумай военачальнікаў, перамога над праціўнікам дасягалася нават без прымянення ядзернай зброі.
Вядома, некаторым заходнім стратэгам тыя вучэнні да гэтага часу сняцца ў начных кашмарах, а вось гэта прывітанне з 90-ых, напэўна, успамінаецца з душэўнай цеплынёй. Так што адзіны прымальны для іх сцэнарый нашых манеўраў - гэта распілоўванне танкаў на металалом і панічныя ўцёкі за Урал. Вось тады нас, упэўнены, паблажліва папляскалі б па плячы.
А вось яшчэ некалькі сухіх лічбаў аб правядзенні вучэнняў "Захад-2017" - было афіцыйна абвешчана ў сакавіку. Але рыхтавацца да адбіцця "беларуска-расійскай пагрозы" НАТА, аказваецца, пачало яшчэ ў 2014-ым. Ужо тады Паўночнаатлантычны альянс стаў павялічваць колькасць вучэнняў і нарошчваць колькасць задзейнічаных у іх вайскоўцаў і тэхнікі. Такой празорлівасці застаецца толькі зайздросціць. Што ж мы маем зараз? 85 манеўраў НАТА запланаваныя на гэты год. Траціна з іх праходзіць ля нашых меж.
А колькасць толькі замежных кантынгентаў у краінах Балтыі і Польшчы складае 8 тысяч чалавек. Плюс бронетэхніка, артылерыя, авіяцыя і, вядома ж, нацыянальныя ўзброеныя сілы. Так што хто на каго нападаць збіраецца - тое яшчэ пытанне.
Прама зараз вучэнні НАТА "Хуткі трызубец" праходзяць на тэрыторыі Украіны. У Швецыі адначасова з "Захадам" стартавалі манеўры "Аўрора". Праз тыдзень 17 тысяч вайскоўцаў прымуць удзел у вучэннях Dragon-2017 у Польшчы. Увесь тыдзень сусветныя СМІ трансліравалі кадры з амерыканскай бронетэхнікай, якая прыбывае ў Гданьск.
А ў пачатку верасня медыя актыўна тыражыравалі балтыйскае турнэ кіраўніка брытанскага МЗС, падчас якога Барыс Джонсан змяніў нататнік і ручку на камуфляж і шлемафон. Кіраўнік дыпламатыі на танку стаў, мабыць, самым красамоўным сімвалам ваеннай дактрыны НАТА.
