Глен Броўман у Беларусі знайшоў не толькі працу мары, але і сям'ю

4 Снежня 2016

Інтэрнэт-тэхналогіі становяцца  візітнай карткай нашай краіны. Беларусь сёння - гэта не толькі трактар і калійныя ўгнаенні, Беларусь - гэта "Свет танкаў", у які гуляюць больш за 110 мільёнаў чалавек на планеце. Кожную секунду ў гульню ўваходзяць, толькі ўдумайцеся, 2 мільёны карыстальнікаў, а стваральнік і кіраўнік праекта Віктар Кіслы стаў першым доларавым мільярдэрам краіны. Беларусь - гэта дадатак MSQRD, які заваяваў не толькі Галівуд, але і ўвесь свет, а ў выніку яго купіў "Фейсбук".  У цэлым мабільнымі дадаткамі, распрацаванымі ў беларускіх кампаніях, карыстаюцца больш за 900 мільёнаў чалавек у 160 краінах. І, вядома, Беларусь - гэта EPAM, адзіная айчынная кампанія, якая каціруецца на Нью-ёркскай фондавай біржы, найбуйнейшы распрацоўшчык праграмнага забеспячэння краіны, выручка якога, згодна з прагнозамі, у 2016 складзе больш за мільярд долараў.

Чаго здзіўляцца, у беларускіх IT-кампаніях па ўсім свеце працуюць тысячы чалавек, а ў Мінск прыязджаюць спецыялісты нават з Амерыкі. Здавалася б, дзе яшчэ ў свеце большая колькасць інавацый на метр квадратны, чым у Каліфорніі. Але Глен Броўман для сябе знайшоў у Беларусі не толькі працу мары, але і сям'ю. З беларускім амерыканцам сустрэлася Ксенія Рабчынская.

Глен Броўман амерыканскую прапіску змяніў на беларускую чатыры гады таму. Гісторыя, прызнаецца, доўгая і крыху банальная: з будучай жонкай іх звёў "Фейсбук", потым некалькі месяцаў жыцця фактычна на борце самалёта -  у пералётах паміж родным штатам Мічыган і Мінскам.

Глен Броўман, Project Manager кампаніі EPAM: "І я вырашыў пераехаць.. Я быў да гэтага ў Беларусі некалькі разоў. Тут добра. Але мне была патрэбна праца. Складана пераязджаць без працы. І я разаслаў рэзюмэ ў розныя кампаніі, і з EPAM  адказалі: прыязджай, давай пагаворым".

Праз тры дні Глен ужо праходзіў сумоўе ў сучасным офісе ў Мінску. І з тых часоў  ні разу не пашкадаваў пра сваё смелае рашэнне. Шчасліва жанаты, двое дзяцей і любімая праца.

Глен Броўман, Project Manager кампаніі EPAM: "Калі вы пытаеце, ці добра тут працаваць, то мой адказ -  цудоўна! Тут думаюць пра супрацоўнікаў, прапануюць наведаць семінары, трэнінгі, курсы, ты пастаянна развіваешся і да таго ж сур'ёзна. Мы прапануем лепшыя ў свеце тэхнічныя рашэнні сваім кліентам. І гэта ўсё працуе тут, у Мінску. Гэта вельмі выдатна для іміджу Беларусі". 

За той час, што жыве тут, аб'ездзіў паўкраіны: любаваўся старым Гроднам, замкамі ў Міры і Нясвіжы, гуляў па Савецкай у Брэсце.  Прымеціў, што беларусы працавітыя і разумныя і як практычна любы іншаземец гаворыць, што мы гасцінныя. І сама краіна  гасцінная для турыстаў.

Дваіх дзяцей: чатырохгадовага Кірыла і двухгадовую Адэліну ў сям'і выхоўваюць з павагай да абедзвюх культур. І, зразумела, дзеці вучацца гаварыць адразу на дзвюх мовах.

Сына Глен аддаў у звычайны сад. Смяецца: на занятках па англійскай выкладчыкі здзіўляюцца ведам малога.

У планах  вяртання на радзіму няма. Адным з важкіх бонусаў жыцця ў Беларусі Глен называе магчымасць падарожнічаць, не марнуючы шмат часу на пералёты. І беларускую кухню.

І гэта зразумела асабліва, калі размова заходзіць пра амбіцыйную каманду, у якой працуе беларускі амерыканец.

Глен Броўман, Project Manager кампаніі EPAM: "EPAM падштурхоўвае да поспеху, яны не чакаюць інавацый, яны самі іх ствараюць".

Ксенія Рабчынская: "Ну і пытанне, якое я не магу не задаць. Што Вы думаеце пра новага амерыканскага  прэзідэнта?”

Глен Броўман, Project Manager кампаніі EPAM: "Вы ведаеце, Амерыка - гэта дэмакратыя. Калі ён не будзе добра працаваць гэтыя чатыры гады, то мы забудзем пра яго і выберам новага прэзідэнта. Прынамсі, нельга меркаваць пра чалавека, пакуль ён не пачаў працу. Спадзяюся, ён будзе працаваць добра".