Мытні даюць дабро на спрошчаную электронную ачыстку грузаў, мадэрнізацыю, пашпартны кантроль на транзітных грузавых участках і максімальную публічнасць у пытаннях раскрыцця шэрых санкцыйных схем. У аўторак Кіраўнік дзяржавы прыняў з дакладам кіраўніка Мытнага камітэта.
Ключавых пытанняў да ведамства ў Прэзідэнта традыцыйна некалькі: як папаўняюць бюджэт, як садзейнічаюць транзітнаму патэнцыялу краіны і ці гатовыя падтрымаць на практыцы рэпутацыю Беларусі як гасціннай гаспадыні вялікіх спартыўных форумаў. Размова, безумоўна, аб ІІ Еўрапейскіх гульнях.
На ўсе пытанні лідара Юрый Сянько адказаў сцвярджальна, з лічбамі і фактамі на руках. Так, паступленні ў бюджэт выраслі на чвэрць, ужо перавысіўшы два мільярды долараў. На траціну павялічыўся транзітны грузапаток праз нашу краіну - у снежні чакаем рэкорд - перавалку 60-мільённай тоны праз Беларусь. У камітэце абяцалі паказаць юбілейную тону журналістам. Да Еўрапейскіх гульняў мытнікі гатовыя. За плячамі і вопыт мінскага хакейнага чэмпіянату і расійскага футбольнага. Спрацавалі на сумленне.
На жаль, не такія сумленныя нашы расійскія калегі. У прэсе саюзнікаў - чарговая хваля папрокаў у адрас Беларусі ў цэлым і нашай мытні ў прыватнасці. Маўляў, прапускаем санкцыйныя тавары, зарабляем на нелегальным трафіку польскіх яблыкаў, галандскай малочкі і балтыйскіх морапрадуктаў.
Праславутымі "беларускімі крэветкамі" нас папракаюць трэці год. Гэта ўжо клішэ - мем. Прычым, абсурдны. Бо дазвол на перапрацоўку морапрадуктаў, падкрэслім - перапрацоўку, і толькі пасля гэтага пастаўку на расійскія прылаўкі быў атрыманы яшчэ тры гады таму з вышэйшага ўзроўню расійскай жа ўлады.
Ну ды і бог з імі, з крэветкамі. Куды складаней беларускай мытні спыняць трафік іншых санкцыйных тавараў. Бо арганізатары, заказчыкі, транзіцёры такіх схем у абсалютнай большасці грамадзяне Расіі, буйныя расійскія гандлёвыя сеткі, сур'ёзныя транспартныя кампаніі з Усходу і высокія чыны і лампасы расійскага саюзніка. У адказ на выкладзеныя Юрыем Сянько факты Прэзідэнт даручыў жорстка разабрацца і з санкцыйнымі каналамі, і з інфармацыйнымі накатамі на нашу краіну.
Даручэнне ўжо прынята да выканання. З гэтага часу самыя гучныя выпадкі будуць рэгулярна трапляць у стужкі навін. Каб у нашых калег не было падставы наракаць на люстэрка. Аб гэтым у эксклюзіўным каментарыі нам расказаў сам кіраўнік Мытнага камітэта Беларусі (відэа).
