Financial Times назвала Дональда Трампа "Чалавекам года"

18 Снежня 2016

Абранага Прэзідэнта ЗША Дональда Трампа газета Financial Times назвала "Чалавекам года". Па меркаванні выдання, сваёй перамогай   мільярдэр перапісаў правілы амерыканскай палітыкі.  Дональд Трамп - зараз ужо афіцыйна - вылучыў на пасаду дзяржсакратара Рэкса Тылерсана - кіраўніка найбуйнейшай у свеце нафтавай карпарацыі "ЭксанМобіл".

Аб гэтых планах стала вядома ўжо некалькі дзён таму, але да канца ў гэта не верыў ніхто. Бо кандыдатуру кавалера расійскага ордэна Дружбы прыйдзецца праводзіць праз кангрэс. А там засілле тых, хто вельмі крытычна ставіцца да нашай суседняй краіны - Расіі. Выходзіць, Трамп кідае свайго роду выклік і пацвярджае свой намер аб нармалізацыі адносін Вашынгтона і Масквы.

Зыходзячы з таго, хто зойме ключавыя пазіцыі ў будучай адміністрацыі, можна заўважыць, што ў найбліжэйшыя гады Амерыкай будуць кіраваць бізнесмены і генералы. Сярод іх Джэймс Мэціс - будучы кіраўнік Пентагона. Яшчэ адзін генерал - Джон Келі - будзе адказваць за нацбяспеку. Адабраўшы больш чым 20 чалавек у сваю каманду для працы ў Белым доме, Трамп зрабіў стаўку ў асноўным на пажылых белых мужчын, шматлікія з якіх з'яўляюцца багатымі людзьмі і аматарамі рызыкі. Палітолагі адзначаюць, што такі выбар мільярдэра нацэлены на тое, каб узварухнуць Амерыку. Выконваць свае паўнамоцтвы яны пачнуць пасля інаўгурацыі Прэзідэнта ЗША 20 студзеня.