На тыдні ў Мінску адбыўся яшчэ адзін буйны міжнародны форум - Кангрэс мясцовых і рэгіянальных улад Савета Еўропы. Абмяркоўвалі пытанні мясцовага самакіравання ў еўрапейскіх краінах.
Гэты орган - своеасаблівы голас еўрапейскай глыбінкі ў Страсбургу. Ён аб'ядноўвае 324 прадстаўнікоў з 200 тысяч муніцыпалітэтаў 47 краін Савета Еўропы. Мінская сустрэча сабрала прадстаўнікоў Францыі, Італіі, Нідэрландаў, Грэцыі, Румыніі. Узначаліла дэлегацыю першая жанчына, якая стала старшынёй кангрэса, - Гудрун Мослер-Цёрнстром.
На сустрэчы з нашым Прэзідэнтам аўстрыйскі палітык адзначыла, што кангрэс гатовы працягваць цеснае супрацоўніцтва з Беларуссю. Аляксандр Лукашэнка запрасіў Гудрун Мослер-Цёрнстром пабываць і на двух форумах рэгіёнаў, якія ў кастрычніку наша краіна праводзіць з Расіяй і Украінай, каб бліжэй пазнаёміцца з вынікамі міжрэгіянальнага супрацоўніцтва. Еўрапейскі палітык запрашэнне прыняла, калі дазволіць графік.
Вялікая цікавасць у кангрэса і да беларускай школы падрыхтоўкі кіраўнічых кадраў. Каб дэталёва вывучыць наш вопыт, дэлегацыя пабывала ў Акадэміі кіравання пры Прэзідэнце Беларусі. Назва ВНУ гаворыць сама за сябе: падрыхтоўка кіруючых кадраў - сфера асаблівай увагі Кіраўніка дзяржавы. Бо большасці з тых, хто ў гэтай аўдыторыі, пачынаць кар'еру прыйдзецца менавіта ў рэгіёнах, з мясцовага ўзроўню. А лекцыя ад кіраўніка кангрэса пры Савеце Еўропы - добрая магчымасць пагутарыць і пераняць лепшае з вопыту замежных калегаў.
