Ёханес Хан прыняў удзел у дзясятым раўндзе нефармальных міністэрскіх дыялогаў краін ініцыятывы ЕС "Усходняе партнёрства". Абмяркоўвалася сітуацыя ў рэгіёне і перспектывы самога праекта. Праекта, арыентаванага на практычныя вынікі. Галоўная ж мэта "Усходняга партнёрства" - стварыць пояс стабільнасці і росквіту, заявіў еўракамісар.
Дарэчы, у гэты свой візіт Ёханес Хан знаходзіўся ў Мінску некалькі дзён і вырашыў сумясціць афіцыйныя мерапрыемствы з прагулкай па горадзе, каб паглядзець на яго не з акна аўтамабіля. Экскурсію для еўрапейскага чыноўніка правяла кіраўнік прадстаўніцтва ЕС у нашай краіне Андрэа Віктарын.
Пагрузіўшыся ў паўсядзённае жыццё Мінска, еўракамісар вынес вердыкт: "Сапраўды цікавы горад для даследавання". Мяркуючы па фота, размешчаным у Твітар-акаўнце Ёханеса Хана, ён паспеў пабываць у Верхнім горадзе, а таксама зазірнуў у ГУМ і ўніверсам "Цэнтральны" - там "вельмі прыгожая ляпніна", якую спадарыня Віктарын пажадала паказаць еўракамісару. Ці купіў Ёханес Хан што-небудзь у сталічных магазінах, на жаль, не паведамляецца. А так быў бы хай невялікі, але ўклад у развіццё беларуска-еўрапейскага тавараабароту.
