На гэтым тыдні на суд беларусаў вынеслі дакументы, якіх з нецярпеннем чакаюць без перабольшання ўсе дзелавыя колы Беларусі. Гутарка аб праектах дакументаў, якія павінны дапамагчы палегчыць вядзенне бізнесу. Цікавасць неймаверная, пачынаючы ад вопытных прадпрымальнікаў, сканчаючы беларусамі, якія яшчэ толькі плануюць увайсці ў бізнес і адкрыць уласную справу. Да гутаркі актыўна далучаюцца і простыя грамадзяне.
Старт вялікай працы быў дадзены некалькі месяцаў таму: у пачатку года Кіраўнік дзяржавы загадаў стварыць спецыяльную групу, якой трэба было пазбавіць бізнес ад залішняга адміністрацыйнага цяжару. Узначаліла яе Кіраўнік Адміністрацыі Прэзідэнта Наталля Качанава. Увайшлі ў гэтую групу і прадстаўнікі ўлады, і дзелавыя колы. Гэта значыць, усе, каму працаваць і зарабляць па новых правілах. Гэта абсалютна новы фармат узаемаадносін бізнесу і дзяржавы.
Праца была праведзеная маштабная. Толькі ўявіце: за гэты час вывучаная сітуацыя на больш як 100 прадпрыемствах краіны, прааналізавана больш за 200 прапаноў ад насельніцтва і бізнесу. Падлучылася і інтэрнэт-супольнасць, вывучаўся замежны вопыт. У працу групы ўключыліся 12 тэматычных падгруп па самых розных пытаннях: ад гандлю і аказання бытавых паслуг да будаўнічай сферы.
Пакет дакументаў - а гэта праект дэкрэта, пяць праектаў указаў і адзін законапраект - атрымаўся сапраўды ўсенародным. Кардынальныя рашэнні, якія будуць прынятыя неўзабаве, крануць як буйны, так і малы бізнес, уключаючы індывідуальных прадпрымальнікаў.
