За месяц да пачатку навучальнага года дзеці вёскі Дабрагошча Жлобінскага раёна засталіся без школы.
Пакуль уся краіна рыхтуецца да новага навучальнага года, мясцовыя жыхары думаюць не аб тым, як і чым напоўніць партфелі. Іх клопаты куды больш сур'ёзныя: у якую школу зараз пойдуць іх дзеці. Мясцовую зачыняюць, а найбліжэйшая за 40 кіламетраў. Раённыя ўлады, якія прынялі рашэнне паставіць кропку ў доўгай гісторыі вясковай школы, прыводзяць сур'ёзны аргумент: будынак - у аварыйным стане. Аднак жыхары і настаўнікі ўпэўненыя: прычына зусім не ў гэтым. Наш карэспандэнт Вольга Халадовіч сустрэлася з тымі, для каго школа - гэта не проста "месца, дзе вучаць".
Што рабіць? Гэтае пытанне зараз як ніколі хвалюе жыхароў вёскі Дабрагошча. Да пачатку навучальнага года засталося менш за месяц, але дзе будуць вучыцца дзеці - дагэтуль незразумела. Мясцовую школу зачынілі. Але з такім рашэннем людзі катэгарычна не згодныя.
Мясцовыя ўлады гавораць: рашэнне вымушанае. У красавіку гэтага года спецыялісты абследавалі будынак і прыйшлі да высновы, што дах у аварыйным стане. Супрацоўнікі навуковай лабараторыі, якія праводзілі экспертызу, сабралі бясспрэчныя доказы.
Але, нягледзячы на гэта, паводле слоў мясцовых жыхароў, у школе без праблем працаваў летні лагер. Хоць, як сцвярджаюць улады, бяспека дзяцей на першым месцы.
Рыхтаваліся да навучальнага года і настаўнікі. Распрацоўвалі праграмы і атрымлівалі спецыяльнае абсталяванне для класаў. Сёння шукаюць працу.
Спецыялісты падлічылі - на капітальны рамонт школы неабходныя прыкладна 300 тысяч рублёў. Такіх грошай у мясцовым бюджэце проста няма. А ўсіх школьнікаў 1 верасня чакаюць у школе ў суседняй вёсцы.
Да найбліжэйшай школы - прыкладна 15 кіламетраў. Але гэта толькі для жыхароў Дабрагошчы. Дзецям з суседніх сёлаў прыйдзецца пераадольваць адлегласць ужо ў 30-40 кіламетраў. Каб палепшыць няблізкі шлях, улады паабяцалі даць школьны аўтобус.
Наталля Сідоркіна, намеснік начальніка аддзела адукацыі Жлобінскага райвыканкама: "Дарога асфальтаваная, узімку чысціцца. Мы на сённяшні дзень даем сюды дадатковы аўтобус, які будзе працаваць толькі на гэты маршрут. Тое, што датычыцца працуючых педагогаў, усім прапанаваная праца. Іншая справа - хто з іх прыняў гэта, хто не прыняў".
Усім, але не ўсім. Галіна Каханчык адпрацавала ў школе 36 гадоў. Гаворыць, пацвердзіла ў Гомелі вышэйшую катэгорыю, здала іспыт і спадзявалася, што выйдзе на працу, але, як апынулася, выйшла на пенсію.
Ёсць яшчэ адна, бадай, самая галоўная праблема. У Дабрагошчы выкладалі на рускай мове. Замежная мова - французская. Прапанаваная наўзамен школа - беларускамоўная з нямецкай замежнай мовай. Бацькі хвалююцца, што гэта стане прычынай непаспяховасці. Ды і дарога для самых маленькіх нават у аўтобусе - выпрабаванне.
Таму бацькі не здаюцца. Гавораць, паправіць дах - не праблема. І гатовыя зрабіць гэта самі. А яшчэ просяць разумення і падтрымкі ў мясцовых улад. Бо да пачатку навучальнага года засталося зусім няшмат часу.
