Агульны тавараабарот паміж Беларуссю і Азербайджанам летась склаў каля 330 мільёнаў долараў. Яшчэ больш пашырыць узаемавыгадны пералік дапаможа двухбаковая вытворчая кааперацыя, якая актыўна расце за апошнія гады. Мы дастаткова ўпэўнена замацаваліся на рынку Азербайджана, паспяхова прадаецца наша прадукцыя, працуюць вытворчасці. Яны самая што ні на ёсць яркая ілюстрацыя таго, як ужо ўвасобленыя ў жыццё тыя ідэі, пра якія прэзідэнты абедзвюх краін гаварылі падчас мінулых сустрэч.
Наш карэспандэнт Вераніка Бута перадае з Азербайджана.
Тэхніка "Атлант" на азербайджанскім рынку прысутнічае ўжо 20 гадоў. За год нават у няпростых эканамічных умовах прадаюць каля 10 тысяч адзінак бытавой тэхнікі. Халадзільнікі і пральныя машыны пад маркай "Зроблена ў Беларусі" за гэты час сталі брэндам.
Іслам Агаеў, дырэктар кампаніі "Энергасэрвіс": "119 кампаній, якія непасрэдна маюць сувязь з нашай кампаніяй па продажы і папулярызацыі гэтай прадукцыі, ахопліваюць 90% Азербайджана".
Гандлёвыя і сэрвісныя цэнтры па ўсёй краіне, гарантыя якасці і даступныя цэны - беларускія тавары ўпэўнена заваёўваюць давер спажыўца.
Кожны дзень у гэтым гандлёвым цэнтры прадаецца мінімум 1-2 халадзільнікі. Летам попыт на іх павялічваецца да 5-6. Тут прадстаўлена практычна ўся лінейка прадукцыі. Самая папулярная (яна ж адна з самых новых) - па сістэме full no frost.
Сёння перспектывы двухбаковага супрацоўніцтва - гэта перш за ўсё праекты, якія выйшлі за рамкі простага тавараабмену. Гэта стварэнне новых сумесных вытворчасцяў. На найбуйнейшым прадпрыемстве Азербайджана - Гянджынскім аўтамабільным заводзе - з канца 2006 года паспяхова збіраюць беларускія грузавікі, трактары, ліфты. Магутнасці прадпрыемства пакрываюць запатрабаванні краіны. Задача сёння - выхад на рынкі трэціх краін з новай прадукцыяй.
Ханлар Фаціеў, старшыня наглядальнага савета вытворчага аб'яднання "Гянджынскі аўтамабільны завод": "На сённяшні дзень на Гянджынскім аўтамабільным заводзе вельмі моцная канструктарска-інжынерная база. І мы, выкарыстоўваючы платформу беларускіх трактароў, аўтобусаў і аўтамабіляў, вырабляем новае навясное абсталяванне. Такі сумесны прадукт мы выводзім у трэція краіны".
Беларусь удзельнічае і ў развіцці транспартнай інфраструктуры Азербайджана. Два месяцы таму паміж Баку і Сумгаітам пачалі курсіраваць электрычкі Stadler, сабраныя ў Фаніпалі. У наступным годзе парк папоўніцца спальнымі вагонамі, якія пусцяць па маршруце Баку - Тбілісі - Карс.
Калі электрычкі толькі пачынаюць заваёўваць папулярнасць у краіне, беларускія прадукты харчавання, без сумнення, ужо не першы год у кошыку азербайджанцаў.
Камран Эюбаў, генеральны дырэктар сеткі магазінаў: "Малочныя прадукты беларускай вытворчасці адны з лідараў на нашым рынку. Пакупнікам падабаюцца смакавыя якасці, паколькі яны блізкія да нашых, а таксама цана прымальная для мясцовага пакупніка".
Акрамя малочнай прадукцыі, прыйшліся даспадобы каўбасы, кандытарскія вырабы і алкаголь. Прадукты з Беларусі на цэнтральных паліцах супермаркетаў.
А краіна-вытворца ў цэнтры ўвагі студэнтаў Славянскага ўніверсітэта Баку, дзе чатыры гады таму з'явілася магчымасць адчуць сябе беларусам у Азербайджане. Навучанне доўжыцца ўсяго год. Але чытаць вершы па-беларуску ўжо могуць. Акрамя вывучэння мовы і літаратуры, увага да культуры, традыцый і сучаснасці.
Іншыя пазнаёміцца з Беларуссю могуць у адзіным у свеце Музеі мініяцюрнай кнігі, які знаходзіцца ў Баку. Калекцыя з больш чым 5,5 тысячы мініяцюр з 66 краін свету - у Кнізе рэкордаў Гінеса. Асобная вітрына - для твораў беларускіх класікаў. Палітычнае жыццё нашай краіны - у цэнтры залы.
Цікавасць да Беларусі на розных узроўнях (ад студэнтаў да палітыкаў і бізнесменаў) яшчэ раз падкрэслівае: тры тысячы кіламетраў сёння не адлегласць.
