Сёлета за кошт знешняга гандлю наша краіна плануе зарабіць амаль пяцьдзясят тры мільярды долараў. Пры гэтым асаблівая ўвага будзе надавацца не толькі разгрузцы складоў, пошуку новых рынкаў збыту, але і экспарту турыстычных паслуг.
Вопыт мінулага года, асабліва падчас чэмпіянату свету па хакеі паказвае, што рост можа быць цалкам рэальны. Прычым як за кошт санаторна-курортнага лячэння і ўласна тураў па Беларусі, так і за кошт продажаў інтэлектуальнай уласнасці. Ганна Рублёва пабывала ў Свярдлоўскай вобласці і даведалася, якія беларускія ідэі будуць запатрабаваныя на Урале.
Свярдлоўская вобласць. Сталіца - Екацярынбург, прамысловы цэнтр - Ніжні Тагіл. Лес, метал, самацветы - вось аснова развіцця эканомікі рэгіёна.
У Ніжнім Тагіле гавораць, што з мясцовага металу быў зроблены першы ў Расіі паравоз і кожны трэці танк Т-34. Сучасны горад не здае сваіх прамысловых пазіцый. Хіба што здабыча малахіту не вядзецца тут ужо з канца 80-х.
Па сутнасці, аднаўляльнай крыніцай з'яўляецца толькі лес, а значыць, на Урале ўпершыню за некалькі стагоддзяў прыходзіцца прымаць рашэнне: што яшчэ неабходна зрабіць для развіцця рэгіёна? Укладваць вырашылі ў турызм: гарналыжныя комплексы, аграсектар і спартыўныя цэнтры. Перавага Беларусі - не толькі ў шматгадовым стажы і будаўніцтве інфраструктуры, але яшчэ і арганізацыі фестываляў і сусветных форумаў - дзіцячага "Еўрабачання" і чэмпіянату свету па хакеі.
Прапанова асабліва актуальная з улікам таго, што 70% экспарту турыстычных паслуг прыпадае менавіта на Расію.
Паводле звестак Міністэрства спорту і турызму, летась наша краіна зарабіла ў гэтым сектары дзвесце трыццаць шэсць мільёнаў долараў. Гэта амаль на 9% больш у параўнанні з 2013. Сёлета планку паднялі амаль у два разы - экспарт турыстычных паслуг павінен дасягнуць чатырохсот васьмідзесяці мільёнаў.
Відавочна, што такі рост цяжкі пры наяўнай інфраструктуры і попыце на падарожжы, які зніжаецца. Але тураператары, падобна, знайшлі нестандартнае рашэнне. Гэта распрацоўка турпакетаў для рэгіёнаў Расіі. Да прыкладу, у Свярдлоўскай вобласці ёсць патэнцыял для спартыўнага, прамысловага і аграрнага турызму. Але гатовых квэстаў або падарожжаў не хапае.
Агратурызму ў Беларусі як сфарміраванай турыстычнай сферы больш за 10 гадоў. Ва ўральскіх вёсках толькі пачынаюць прымаць гасцей. Туды можна дабрацца праз лясы па вузкакалейцы. І тут беларусам таксама ёсць што сказаць. Не важна, гутарка пра сельскі або дзелавы турызм.
Дарэчы, менавіта культурныя сувязі паміж нашай краінай і Уралам самыя трывалыя. Уладзімір Мулявін, які нарадзіўся ў Свярдлоўску, сваё жыццё звязаў з Беларуссю. Наталля Гайда некалькі гадоў выступала на сцэне Свярдлоўскага тэатра оперы і балета, а зараз - прымадона беларускай аперэты.
А на такой глебе значна прасцей грунтаваць эканамічныя адносіны. Урал - мяжа паміж Еўропай і Азіяй. А гэта падвойная адказнасць для беларусаў - зарабіць рэпутацыю на абедзвюх частках свету.
