На гэтым тыдні былі юбілеі ў нашых класікаў. Марку Шагалу - 130. А Янку Купалу - 135. Але, вядома ж, галоўная ўрачыстасць - дзень нараджэння краіны. Беларусь ярка і грандыёзна, маштабна і гучна адзначыла Дзень Незалежнасці. Найважнейшая дата ў гісторыі краіны і глыбока асабістае свята для кожнага. І гэта не высакамоўныя словы.
Погляды мільёнаў беларусаў 3 ліпеня былі прыкаваныя да стэлы "Мінск - горад-герой". Тысячы гледачоў усіх узростаў, прыбраных, з флагамі прыйшлі ўбачыць на свае вочы галоўную падзею дня - парад ваеннай тэхнікі і машын грамадзянскага прызначэння. Беларусь развіваецца як незалежная дзяржава, якая праводзіць міралюбную палітыку. Гэта падкрэсліў Прэзідэнт Аляксандр Лукашэнка ва ўрачыстай прамове. І асабліва адзначыў: Беларусь выступае за рашэнне любых міжнародных канфліктаў за сталом перамоў.
Важкі ўклад у павышэнне боегатоўнасці войскаў уносіць айчынны абаронна-прамысловы комплекс. Сёння больш як сотня ўзораў беларускіх вырабаў ваеннага прызначэння ўяўляе сабою прынцыпова новую інавацыйную прадукцыю. І на парадзе многія з іх шырокай публіцы паказалі ўпершыню. Бронетранспарцёры, высокаманеўраныя недарожнікі, сучасныя танкі.
Упершыню на парадзе - беларуская распрацоўка - лёгкі бранявік "Кайман", які плавае, як сусветны рэкардсмен. Цікавасць выклікалі беспілотнікі, створаныя ў Беларусі. Напрыклад, адзіны ў свеце ў сваім класе "Індэла Скай Бур" з оптыка-электроннай сістэмай прыцэльвання і далёкасцю стральбы да 1 700 метраў. "Волат" - вытворчасці МЗКЦ з самай сучаснай інфармацыйна-кіруючай сістэмай. І па-за канкурэнцыяй у авацыях - рэактыўная сістэма залпавага агню "Паланез".
Вышэйшы пілатаж прадэманстраваў у небе беларускі паветраны эшалон. Пляц-парадам з новымі фігурамі гледачоў здзівіла рота ганаровай варты. І моц ваенную гарманічна дапоўніла прамысловая сіла беларускай дзяржавы. Найноўшыя аўтамабілі, грузавікі, камбайны, аўтобусы, спецтэхніка. Дасягненні цяжкай, лёгкай і харчовай прамысловасці. І бясспрэчны фаварыт дзейства - сімвал беларускага машынпрама, які танцаваў, - трактар "Беларус".Беларусь гэтымі днямі павіншаваў, без перабольшання, увесь свет. Урачыстыя пасланні на адрас беларускай дзяржавы прыйшлі ад лідараў дзясяткаў краін свету. Сярод іх прэзідэнты Расіі, Канады, Турцыі, Швейцарыі, Сербіі і шматлікія-шматлікія іншыя. Цёплыя словы прагучалі ад кіраўнікоў сусветных арганізацый - такіх, як ААН, FAO, Шанхайскай арганізацыі супрацоўніцтва.
Па геаграфіі віншаванняў можна адсачыць ключавыя пазіцыі нашай знешняй палітыкі і зацікаўленасць свету ў беларускай дзяржаве. Старшыня КНР Сі Цзіньпін у віншаванні пацвердзіў гатоўнасць разам умацоўваць партнёрства ў розных галінах. А прэзідэнт Казахстана Нурсултан Назарбаеў канстатаваў трывалыя традыцыі сяброўства, якія злучаюць Казахстан і Беларусь.
Лідары еўрапейскіх краін адзначылі ў пасланнях прыкметную актывізацыю беларуска-еўрапейскіх адносін. У прыватнасці, гэта было ў віншаваннях прэзідэнта Германіі Франка-Вальтэра Штайнмаера і польскага лідара Анджэя Дуды. "Упэўнены, што адноўлены дыялог паміж Мінскам і Еўрапейскім саюзам створыць добры кантэкст для сумесных ініцыятыў". Гэта словы прэзідэнта Італіі Серджыа Матарэлы.
Гаварыць аб віншаваннях можна доўга. Але варта таксама адзначыць, што святочныя пасланні з самымі цёплымі словамі на адрас беларусаў дашлі не толькі ад сусветных палітыкаў, але і ад рэлігійных дзеячаў: Патрыярха Маскоўскага і ўсяе Русі Кірыла і Папы Рымскага Францыска. Яны пажадалі ўсім моцнага здароўя, дабрабыту і дапамогі Божай у добрых справах.
Каб адчуць яркія эмоцыі свята і перадаць усю яго атмасферу, трэба знаходзіцца ў самым яго цэнтры. Тэхніка, парадныя разлікі, авіяцыя - усё, як на далоні. Але ведаеце, што мяне ўразіла больш за ўсё? Гэта людзі, якія прыйшлі на парад. Як толькі галоўнае дзеянне завяршылася, людзі літаральна абкружылі нашу студыю. Шчаслівыя, прыбраныя, з шырокімі ўсмешкамі на тварах. Дашлі хтосьці ў адзіночку, хтосьці парамі, былі цэлымі сем'ямі. І, гутарачы з імі, высветлілася, што сярод іх не толькі мінчане! Людзі прыехалі на парад з беларускіх рэгіёнаў, здалёку. Цёплыя прывітанні ўсім нам перадавалі з Украіны і нават з Амерыкі.
У гэты момант у выязной студыі быў Анатоль Ярмоленка. І ён прапанаваў усім нам праспяваць! Ідэю, вядома ж, успрынялі на ура. Давайце паглядзім тыя самыя кадры, якія засталіся па-за эфірам.
