Прыкласці ўсе намаганні, каб убраць хлеб у тэрмін і без страт. Аб арганізацыі ўборачнай-2018 у паўночным рэгіёне краіны сёння ішла размова на пасяджэнні Віцебскага аблвыканкама з удзелам міністра сельскай гаспадаркі.
На гэты момант уборачныя камбайны працуюць на палях 17 раёнаў вобласці. Галоўным фактарам, які стрымлівае, з'яўляецца надвор'е. Гатоўнасць машын да гарачай пары - 91 працэнт. У найбліжэйшыя дні, падкрэслілі на пасяджэнні, будуць адрамантаваныя ўсе астатнія. Сёлета аграрыі поўначы Беларусі плануюць убраць 330 тысяч гектараў збожжавых.
Падчас пасяджэння Леанід Заяц звярнуў увагу, што ў паўночным рэгіёне краіны неабходна больш увагі надаваць і нарыхтоўцы кармоў. Зараз у вобласці ідзе ўборка травы другога ўкосу.
