Выстава "Белагра-2019" аб'яднала аграрыяў з 30 краін

4 Чэрвеня 2019
Значная падзея для беларускіх аграрыяў! "Белагра" прэзентуе ўсё самае смачнае і цікавае. Штогод сюды прыязджаюць госці высокага рангу. Бо менавіта тут цікавасць да дасягненняў беларускай аграрнай навукі перарастае ў доўгатэрміновае партнёрства.

Што пакажа "Белагра"  на гэты раз? Раскажа Вольга Анішчанка.

Рухавік гандлю - так прынята гаварыць пра "Белагра". Бо прама на гэтай пляцоўцы можна літаральна ўсё агледзець, пратэсціраваць, прыцаніцца. Гэта такі агляд дасягненняў аграрнай навукі. І свае, і госці  дакладна ведаюць: тут усё самае-самае! Тое, што выйдзе ў палі заўтра. А таму дзе ж, як не тут  заключаць самыя выгадныя здзелкі! "Белагра" штогод прыносіць краіне мільённыя кантракты.

Кожны каравай - сімвал "Белагра" - пачынаецца са збожжа. Яго апусцілі ў зямлю яшчэ летась, а сёлета атрымалі цэлае эксперыментальнае поле! Пшаніца, жыта, ячмень. Сарты беларускай селекцыі побач з імпартнымі. Кожны зацікаўлены наведвальнік можа  на свае вочы ацаніць вынік.

Гэтую беларускую пшаніцу адправяць на хлеб. Сёння  сарты айчыннай селекцыі  поўнасцю забяспечваюць патрэбнасці ўнутранага рынку. Наогул свайго збожжа ў нас 80 %. Завозяць мінімум. Так сказаць, для падтрымання тонусу селекцыянераў. Але сваю марку трымаем, гаворыць гендырэктар. І ўраджайнасць на ўзроўні, і цана  ў  некалькі разоў больш  прыемная. 

Словам, з хлебам будзем! Сёння ў гаспадарках галоўнае - зніжаць выдаткі вытворчасці. Рэальная выгада - сістэмы дакладнага земляробства. У палі выходзяць беспілотнікі – яны  паведамляюць гаспадарам пра пустазелле ці падкормку раслін. Тэхніка дакладна ўносіць насенне або ўгнаенні, рацыянальна размяркоўвае рэсурсы. І ўраджаі вышэйшыя, і эканомія большая. Калі рухацца па полі па зададзенай траекторыі - гэта ўжо мінус 15 % выдаткаў! Сёння справа  за адзіным інфармацыйным рэсурсам. Гавораць, у наступным годзе такі будзе гатовы. А гэта значыць, зялёнае святло для ўсіх вытворцаў! Пытаемся: накладна? 

Што важна: працаваць па прынцыпах дакладнага земляробства беларуская тэхніка ўжо гатова. "Белагра" дэманструе нават машыны, якім не патрэбны вадзіцель. Мінскі трактарны паказвае базавую мадэль. Тут  і новыя экалагічныя нормы (каб павысіць канкурэнтаздольнасць у тым ліку на еўрапейскім рынку), і радыёкіраванне. Будзе згода  - у палі выйдзе ўжо сёлета.

Менавіта тэхналогіі сёння дазваляюць штогод павялічваць аб'ёмы вытворчасці. Больш вырабляем - больш прадаём. Гэтая формула працуе і сёлета. Крыху  больш за  5 мільярдаў  атрымліваем ад продажу харчавання. Але можам больш, заяўляе сёння ўрад. Усе беларуска-расійскія складанасці з доступам на суседні рынак разлічваюць мінімізаваць. Віцэ-прэм'ер  запэўнівае: экспарт працягвае расці. Выходзіць, дамаўляцца атрымліваецца.

Як абмежаванні на пастаўкі  паўплывалі на працу прадпрыемстваў толькі за апошні год? Кіраўнік малочнага холдынга, чыя кампанія была літаральна пад забаронай у Расіі ўвесь 2018-ты, адзначае: сёння градус напружання спаў. Рынак адкрылі. І тыя, хто мінулы год правёў у стратах (амаль два дзясяткі кампаній), сёння гавораць аб дынаміцы. Усё ж беларускі вытворца Расіі патрэбны. І ён у такіх жа аб'ёмах будзе запатрабаваны як мінімум найбліжэйшую пяцігодку. Нават на фоне ўсіх заяў аб тым, што Расія зальецца сваім малаком. Ды і для нас суседні рынак - гэта найбольшая дабаўленая вартасць. Галоўнае сёння - умець дамовіцца, запэўнівае вытворца. 

Аб кампрамісах сёння скажа і міністр Еўразійскай эканамічнай камісіі - спецыяльны госць "Белагра". Перамовы - вось тое, што дазволіць захаваць узаемныя інтарэсы. Да таго ж з будучага года Беларусь у Еўразійскім саюзе старшыня. Чым не магчымасць прасоўваць ідэі паўнапраўнага партнёрства?

Яшчэ і зніжаць залежнасць ад расійскага рынку. ЕЭК гаворыць аб гэтым як аб неабходнасці для Беларусі. Траціна ў іншыя краіны - падушка бяспекі для беларускага экспарту. Сёння ў пастаўшчыках ледзь не сотня дзяржаў.  На "Белагра" гатовыя нарошчваць гэтую статыстыку. Да канца тыдня тут чакаюць дэлегацыі з розных кантынентаў,  якія гатовы змацаваць подпісамі цікавасць да беларускай аграрнай справы.